Lenta.ru-ի փոխանցմամբ՝ Ուկրաինայից վտարել են վրացի «օրենքով գող» Գեորգի Լոբժանիձեին՝ «Կուցու» մականունով: Այս մասին հայտարարել է Ուկրաինայի կազմակերպված հանցավորության դեմ պայքարի գլխավոր վարչությունը:
Վերջինիս հաղորդմամբ՝ «օրենքով գողը» իր հայրենիքում դատապարտված է եղել ծանր հանցագործությունների համար, իսկ Ուկրաինա ժամանելուց հետո ակտիվ մասնակցություն է ունեցել գողերի հավաքներին և վերահսկողություն է հաստատել նյութական բնույթի հանցագործություններ կատարող խմբերի նկատմամբ:
«Կուցուն» բնակվում էր Դոնեցկի մարզում, իսկ 2007 թվականին, կեղծ փաստաթղթղերի հիման վրա, նրան հաջողվել էր անգամ ստանալ Ուկրաինայի քաղաքացիություն: Այս հանգստյան օրերին «Կուցուն» ձերբակալվել էր Դոնեցկում: Դրանից հետո ստուգվել էր Ուկրաինայի տարածքում նրա գտնվելու օրինականությունը, և արդյունքում որոշվել է արտաքսել նրան երկրից ու զրկել Ուկրաինայի քաղաքացիությունից:
Որոշակի տվյալներով՝ «Կուցուն» Ուկրաինայից մեկնել է Ռուսաստան, ոչ թե հայրենիք:
Հիշեցնենք, որ 2003 թվականի նոյեմբերին Վրաստանում անցկացված «Վարդերի հեղափոխությունից» (Սաակաշավիլիի իշխանության գալուց) հետո Վրաստանում կոշտ միջոցներ ձեռնարկվեցին «օրենքով գողերի» դեմ: Քրեական օրենսդրությունում կատարվեցին մի շարք ուղղումներ, որոնք հնարավորություն տվեցին բանտ նստեցնել անգամ միայն այդպիսի կարգավիճակ («օրենքով գող») ունենալու համար:
Դրա հետ կապված՝ մի շարք «օրենքով գողեր» հայտնվեցին բանտում, իսկ մյուսները ստիպված եղան լքել Վրաստանը և տեղափոխվել այլ երկրներ:
