Իրանական Mehr News գործակալության փոխանցմամբ՝ Իրանի խորհրդարանի էներգետիկ հանձնաժողովը պատրաստել է տնտեսական միջոցների հատուկ փաթեթ՝ չեզոքացնելու համար երկրի նկատմամբ սահմանված պատժամիջոցները: Հանձնաժողովի փոխղեկավար Ալի Մարվին հայտարարել է, որ այդ փաթեթը բաղկացած է 7-8 կետից և դեռ չի հաստատվել խորհրդարանի կողմից:
Փաթեթի երեք կարևոր կետերում ասվում է, որ տեղական ապահովագրական ընկերություններն ապահովագրելու են նավթային լցանավերը, նախագահը պատասխանատվություն է կրում նավթի վաճառքի համար, ընդ որում՝ թե՛ երկրի ներսում, թե՛ երկրից դուրս, Իրանը նավթային լցանավեր է վարձակալելու այլ երկրներից:
Մարվին հավելել է, որ իրանական ապահովագրական ընկերությունների ղեկավարները սերտորեն համագործակցելու են խորհրդարանի էներգետիկայի հանձնաժողովի հետ: Մարվիի խոսքերով՝ մի շարք երկրներ Իրանին մերժել են լցանավերի վարձակալության հարցում, իսկ մի շարք երկրներ էլ հետաքրքրություն են ցուցաբերել դրա նկատմամբ:
Հիշեցնենք, որ հուլիսի 1-ին ամբողջությամբ ուժի մեջ է մտել դեռևս հունվարի 23-ին իրանական նավթի ներկրման վրա դրված բեռնարգելքը:
