Քաջարանի համայնքային մանկապարտեզում ՄԱԿ-ի Զարգացման ծրագրի կողմից իրականացված «Հայաստան. քաղաքային ջեռուցման և տաք ջրամատակարարման էներգաարդյունավետության բարձրացում» ծրագրի շրջանակներում կատարված աշխատանքներին տեղում ծանոթացել է ուրբաթ Քաջարան ժամանած ՄԱԿ-ի համակարգող, ՄԱԿ-ի զարգացման ծրագրի Հայաստանի մշտական ներկայացուցիչ Դաֆինա Գերչևան:
Ծրագրի ընդհանուր արժեքը 25 մլն 700 հազար դրամ է, որից 17 մլն 500 հազարը տրամադրել է Քաջարանի քաղաքապետարանը: Էներգախնայողության և արևային ջրատաքացուցիչներով տաք ջրամատակարարման համակարգի ներդրման նպատակով շենքի տանիքին տեղակայվել են 16 քմ մակերեսով արևային ջրատաքացուցիչ կոլեկտորներ:
Արևային էներգիայով ստացված տաք ջուրը պահեստավորվում է 700 լ տարողությամբ կուտակիչ բաքում: Համակարգը թույլ է տալիս ստանալ տարեկան մոտ 16 200 կՎտ/ժ ջերմային էներգիա կամ աշխատանքային օրերին մոտ 1խմ:
Նախ նորոգվել է շենքը, փայտյա մաշված պատուհաններն ու դռները փոխարինվել են առավել բարձր ջերմամեկուսիչ հատկություններով օժտված էներգախնայող դռներով ու պատուհաններով։ Մանկապարտեզ հաճախող թվով 116 երեխաները հնարավորություն ստացան օգտվելու տաք ջրից։
Բացի սրանից մանկապարտեզում բնական գազի օգտագործման ծավալները նվազել է 20 տոկոսով։Տիկին դեսպանը շրջեց մանկապարտեզում, անձամբ ստուգելով ամեն ինչ՝ սկսած տաք ջրի առկայությունից։
«Քաջարանը Սյունիքի միակ համայնքը չէ, որտեղ ծրագրեր ենք իրականացնում: Էներգախնայողության ծրագիր իրականացրել ենք նաև Կապանի երեխաների խնամքի և պաշտպանության գիշերօթիկ դպրոցում, Մեղրիում աջակցում ենք փոքր ու միջին բիզնեսի զարգացմանը, Գորիսի և Կապանի անտառտնտեսություններում անտառվերականգնման աշխատանքներին են աջակցում:
Համոզված եմ, որ առաջիկայում նոր ծրագրեր կիրականացնենք Սյունիքում, քանի որ այստեղ կատարվող աշխատանքներին մեզ աջակցում են ե’ւ բնակիչները, ե’ւ մարզային ու տեղական իշխանությունները», – պատասխանելով լրագրողների հարցերին ասաց Դ.Գերչևան:
Վերջինս եղավ նաև Քաջարանի արհեստագործական քոլեջում։ Այստեղ ևս էներգախնայողության ծրագիր է իրականացվելու։
Իսկ Քաջարանի համար 1 դպրոցում տիկին դեսպանը ծանոթացավ այստեղ բացված էկոլոգիայի առաջին լաբորատորիային։ Մայրաքաղաքից ժամանած հյուրերին, Սյունիքի մարզային ու Քաջարանի քաղաքային իշխանության ներկայացուցիչներին վերջում ողջունեցին մանկապարտեզի սաները։
