ԱՄՆ նախագահ Բարաք Օբամայի նախընտրական շտաբը հեռուստատեսային հոլովակ է թողարկել, որում պատմվում է նրա հակառակորդ Մանչեսթրի նախկին նահանգապետ Միթ Ռոմնիի` աբորտը ամբողջովին արգելելու մտադրությունների մասին: Հոլովակը տեղադրված է նաև համացանցում:
Հոլովակում հաստատվում է, որ Ռոմնին սատարում է աբորտն ամբողջությամբ արգելող օրենքը, այդ թվում նաև բռնաբարությունների և արյունապղծություների դեպքում:
Ինչպես հաղորդում է Fox News-ը 30 վայրկյանանոց հոլովակը հուլիսի 7-ին հեռարձակվել է այն 8 նահանգներում, որտեղ թեկնածուներից ոչ մեկը անվերապահ աջակցություն չի վայելում:
Ռոմնիի նախընտրական շտաբը հայտարարել է, որ Մանչեսթրի նախկին նահանգապետի դիրքորոշումը հոլովակում խեղաթյուրվել է: 2011 թվականի հունիսին National Review պարբերականի հրապարակման մեջ Ռոմնին նշում էր, որ աբորտը պետք է թույլատրելի լինի բռնաբարության, արյունապղծության դեպքում, կամ էլ եթե այն անհրաժեշտ է մոր կյանքը փրկելու համար:
Ռոմնիի շտաբում նշել են նաև, որ այդ հոլովակը սկսվել է հեռարձակվել այն բանից հետո, երբ գործազրկության մասին նոր տվյալներ են հայտնվել: Հայտնի է դարձել որ գործազրկությունը չի նվազել: Ռոմնիի ներկայացուցիչները մեկ անգամ չէ, որ վստահեցրել են, որ Օբամայի շտաբը մտադիր է բոլոր միջոցներով ընտրողների ուշադրությունը հեռու տանել տնտեսական դժվարություններից:
