Քիչ առաջ Շառլ Ազնավուրի հրապարակից մեկնարկեց «Ոսկե ծիրան» միջազգային 9-րդ կինոփառատոնը:
Կինոռեժիսոր, «Ոսկե ծիրան» կինոփառատոնի հիմնադիր տնօրեն Հարություն Խաչատրյանը, փառատոնի մյուս կազմակերպիչները հայ և օտարազգի կինոգործիչների հետ անցան կարմիր գորգի վրայով:
Հարություն Խաչատրյանը նշեց, որ Կինոյի տոնը արժանի է քաղաքին և հայ ժողովրդին, որովհետև ինը տարում ապացուցվեց, որ հայերը շատ են սիրում կինոարվեստը, կա կինոհանդիսատես, որը շատ է սիրում արվեստային ֆիլմեր: Այն երիտասարդները, որոնք ինը տարում զարգացան, մեծացան և դարձան մասնագետներ կինոյում, այսօր իրենց նոր ֆիլմերով հանդես են գալիս տարբեր միջազգային փառատոներում: Նա հիշեցրեց, որ հայկական կինոն այսօր երկու բաժնով է հանդես գալիս. մեկը միջազգային խաղարկային ֆիլմերն են, մյուսը` փաստագրական:
«Այնպես որ զարգացումը մեր աչքի առաջ է»,- իր խոսքում նշեց Հարություն Խաչատրյանը:
Փառատոնի հովանավոր «ՎիվաՍել-ՄՏՍ»-ը արդեն յոթերորդ տարին է` հովանավորում է փառատոնը: Ընկերության գլխավոր տնօրեն Ռալֆ Յիրիկյանը լրագրողների հետ զրույցում ասաց, որ նպատակ կար անպայման փառատոնի տասնամյակը տեսնել: Փառատոնն ինքը, ըստ Յիրիկյանի, յուրահատուկ անցաթուղթ է, որը տարածում է հայի անունը մեծ աշխարհում:
«Ամեն տարի փառատոնի շրջանակներում արվեստագետներ են գալիս Հայաստան, և մեր երկիրը ճանաչելի է դառնում, ճանաչելի է դառնում` ովքեր ենք մենք որպես հայ, և սա է պատճառը, որ մենք կանգնել ենք փառատոնի կողքին, որովհետև մենք լավ գիտենք, որ այս փառատոնը տարեցտարի բարձրացնում է մակարդակը»,-նշեց «ՎիվաՍել-ՄՏՍ»-ի գլխավոր տնօրենը:
