Բոտուլիզմը թունավորում է, որը տեղի է ունենում անորակ կամ սխալ պատրաստված սննդամթերքից: Բոտուլիզմի հարուցիչներ միշտ կան հողում: Անգամ լավ լվացված բանջարեղենի վրա մնում են այդ հարուցիչները, որոնք վերանում են խիստ բարձր ջերմության դեպքում, որը հնարավոր է ստանալ միայն գործարանային պայմաններում: Արտակարգ իրավիճակների ծառայությունից զգուշացնում են զերծ մնալ տանը պահածոյացված սննդամթերքից, օգտագործելու դեպքում էլ այն եռացնել գոնե 15 րոպե:
Բոտուլիզմի հարուցիչը վտանգավոր չէ, սակայն իր կենսագործունեության ընթացքում արտադրում է թույն՝ բոտուլոտոքսին, որը մինչև այժմ հայտնաբերված ամենաուժեղ մանրէային թույնն է: Բոտուլոտոքսին պարունակող սննդամթերքը ոչնչով չի տարբերվում նորմալից, այս հարուցիչը չի ակտիվանում քաղցր և թթու միջավայրում:
Բոտուլիզմ կարող է առաջանալ պահածոյացված կարմիր տաքդեղից, խավյարից, սմբուկի խորովածից, լոբուց և այլն: Հարուցիչը ի հայտ է գալիս ուտելուց 12-14 ժամվա ընթացքում, երբեմն՝ ավելի ուշ: Տուժածի մոտ առաջանում է գլխապտույտ, գլխացավ, մկանների թուլացում: Հնարավոր է կոպերի իջեցում, շլություն:
Բժիշկները նման դեպքերում խորհուրդ են տալիս անմիջապես առաջացնել արհեստական փսխում, անհապաղ կանչել շտապօգնություն և սեփական միջոցներով չփորձել լուծել խնդիրը, քանի որ այն շատ վտանգավոր է և ունենում է նույնիսկ մահվան ելք: Սակայն նրանք հորդորում են նման դեպքերից խուսափելու կամ հաշմանդամ չմնալու համար զերծ մնալ տնային պայմաններում պահածոյացված սննդամթերքից: