Սերբ թենիսիստ Նովակ Ջոկովիչը, որը «Ուիմբլդոն»-ի 2012 թվականի մրցաշարի կիսաեզրափակիչում զիջեց Ռոջեր Ֆեդերերին, բրիտանական մամուլին տված հարցազրույցում խոստովանեց, որ շվեյցարացին արժանի է ATP վարկանիշային աղյուսակը գլխավորելուն.
«Ֆեդերերն արժանի է ATP վարկանիշային աղյուսակը գլխավորելուն և մրցաշարի եզրափակիչում հաղթանակ տանելուն: Նա ցնցող մրցաշրջան է անցկացնում և կայուն ելույթներ ունենում` խուսափելով լուրջ ձախողումներից:
Այժմ ամեն ինչ Ռոջերի ձեռքերում է: Վերջին մի քանի տարիներին նա «Մեծ սաղավարտ»-ի մրցաշարերի հաղթող չի ճանաչվել, բայց մշտապես հանդես է եկել եզրափակիչներում ու կիսաեզրափակիչներում:
Ավելի վաղ Ֆեդերերը մշտապես գլխավորում էր ATP վարկանիշային աղյուսակը: Հետո եկավ Նադալի ժամանակաշրջանը: Դրան հաջորդեցին երիտասարդ թենիսիստների հաջող ելույթները, որոնք հասկացան, որ կարելի է շրջանցել նրանց: Նրանց թվում էինք նաև ես ու Մարեյը»,- հայտարարել է սերբ մարզիկը:
