ՌԴ արտգործնախարարության հատուկ ներկայացուցիչ Ալեքսանդր Լուկաշևիչը պատասխանել է Независимая Газета-ում տպագրված հոդվածին, որտեղ անդրադարձ է եղել Ադրբեջանի տարածքում գոյություն ունեցող երկու ռուսական անկլավային գյուղերին:
Վերջերս գյուղերի բնակիչները դիմել էին հայկական լրատվամիջոցների օգնությանը` խնդրելով բարձրացնել իրենց խնդիրները: Ռուսաստանի քաղաքացի բնակիչները նշում էին, որ ադրբեջանական իշխանությունները իրենց ստիպում են ընդունել այդ երկրի քաղաքացիություն:
Լուկաշևիչը հայտարարել է, որ լրագրողներն անփութորեն են մոտեցել որոշ փաստերի:
Նա շեշտել է, որ գյուղերի խնդիրների մասին տեղյակ են և՛ Մոսկվայում, և՛ Բաքվում, իսկ խնդիրը արմատավորվել է խորհրդային տարիներին, երբ գյուղատնտեսական նպատակներով Ռուսաստանն ու Ադրբեջանը տարածքներ են փոխանակել:
«Ներկայումս Ռուսաստանն ու Ադրբեջանը տարածքային պահանջներ չունեն: Երկու երկրների սահմանները հստակ են ինչպես ցամաքում, այնպես էլ Կասպից ծովի հատակով: այն համապատասխանում է երկու երկրների խորհրդային վարչական սահմաններին»,- ասել է Լուկաշևիչը:
Միևնույն ժամանակ նա ընդունել է առկա խնդիրը, որի լուծմամբ զբաղվում են դաշնային մի քանի գերատեսչություններ: Բաքվում արդեն համապատասխան խորհրդակցություն է անցկացվել: