Ինչպես արդեն մի քանի տարի հայտարարում են որոշ գիտնականներ, մեղուների անհետացումը կարող է մի քանի տարվա ընթացքում հանգեցնել մարդկության մահին: Այս մասին դեռ ժամանակին գրել էր Էյնշտեյնը: Այս միջատները աշխարհում ամենօգտակարն են, քանի որ բացի մեղր տալուց, փոշոտում են գյուղատնտեսական բույսերի մոտ մեկ երրորդը, այդ թվում` խնձորը, լոլիկը, ցիտրուսները և այլն:
Նրանց թվաքանակի կրճատումը կարող է էլ ավելի վատացնել իրավիճակը` կապված պարենային ճգնաժամի հետ, որին բախվել է մարդկությունը:
Որոշ գիտնականների կարծիքով, մեղուները վերանում են այն պատճառով, որ մարդիկ սկսել են ավելի շատ թունաքիմիկատներ օգտագործել, ինչն ազդում է նաև մեղուների վրա: Բացի այդ, կարծիք կա, որ մեղուները սատկում են արագ տարածվող վիրուսների կամ մակաբույծների պատճառով: Այս մասին գրում է The Daily Telegraph-ը:
Այս խնդիրն առկա է աշխարհի գրեթե բոլոր վայրերում: 1961թ.-ից սկսած մեղուների թվաքանակը կրճատվել է 2 անգամ, իսկ մեկ հեկտարին հասնող մեղուների միջին թվաքանակով` 90%-ով: Օրինակ` ԱՄՆ-ում ձմեռվա ընթացքում սատկում են մեղուների մոտ 30-35%-ը, այնինչ անցյալում այդ թիվը չէր գերազանցում 10%-ը:
Իրավիճակը շտկելու կամ էլ ավելի չբարդացնելու համար մեղվապահները կոչ են անում հրաժարվել որոշ թունաքիմիկատներից, մինչև որ գիտնականները կպարզեն մեղուների վերացման իրական պատճառները:
