Այսօրվա իրավիճակը՝ մեր շրջապատում տեղի ունեցող մարդասպանությունների ֆոնին, նմանվում է հին ժամանակների գլադիատորական մարտերին, երբ արիստոկրատների՝ այն օրերի օլիգարխների ձեռքով արյուն էր հեղվում: Այսօր տեղի ունեցած մամուլի ասուլիսի ժամանակ այս մասին ասաց Կամերային երաժշտության թատրոնի գեղարվեստական ղեկավար Դավիթ Հակոբյանը՝ միաժամանակ հավելելով, որ նույնիսկ անտիկ թատրոնում իրական մարդասպանություն բեմադրելիս հանդիսատեսի աչքի առջև արյուն չէր հեղվում, գործողությունը կատարվում էր կուլիսներում:
Նրա խոսքով՝ ազգովի չենք ուզում մի կարևոր ճշմարտություն հասկանալ. ամենակարևորը կրթությունն է. որքան շատ ուսյալ մարդ, այնքան քիչ խնդիրներ:
Անդրադառնալով ՀՀ նախագահ Սերժ Սարգսյանի կարգադրությանը՝ լրջորեն հետևել հեռուստաեթերի որակին, Դավիթ Հակոբյանը նկատեց, որ երկրի ղեկավարին այդ խնդրով դիմողների վիճակը նմանվում է «բարի ցարին» դիմելու իրավիճակին:
Ասուլիսի մյուս բանախոս՝ դերասան Տիգրան Ներսիսյանն իր հերթին նկատեց, որ հայ հասարակությունն այսօր իսկական գժանոցի մեջ է ապրում: «Յուրաքանչյուրս մեղավորություն ունի նրանում, որ մեր շրջապատում այսքան շատ ագրեսիա ու մարդասպանություններ են տեղի ունենում:
Մարտի դաշտում քո դեմ, հասկանալի է, թշնամի է կանգնած, բայց երբ առօրյայում քո առջև հայտնվում է ագրեսիվ հայրենակիցդ, դա անհասկանալի է: Մենք ծայրահեղական ազգ ենք, բայց պնդել, որ սերիալներն են ինքնասպանություններ հրահրողը, ճիշտ չէ: Հարցը շատ ավելի լուրջ ու խորքային է»,- ասաց նա:
Անդրադառնալով հեռուստաեթերի որակը վերահսկելու խնդրանքով նախագահին դիմելու նախաձեռնությանը՝ Տիգրան Ներսիսյանը նկատեց. «Սխալ է, որ այդ հարցով նախագահին են դիմել: Կա կոնկրետ հասցեատեր՝ Հանրային խորհուրդը, որն էլ պետք է զբաղվեր խնդրով: Սա և լավ, և միաժամանակ վատ նախաձեռնություն է և ցույց է տալիս, որ բացի նախագահից՝ երկրում ոչ մի ինստիտուտ չի աշխատում»,- ասաց դերասանը:
