Սինդի տիկնիկների արտադրող բրիտանական Pedigree Dolls & Toys արտադրողը որոշել է հրաժարվել «սուպերմոդելի» կերպարից ու փոխել խաղալիքների իմիջը: Այս մասին հայտնում է բրիտանական The Guardian-ը: Ինչպես նկատում է հրապարակությունը, Սինդին շատ է զիջում իր գլխավոր մրցակցին`ամերիկյան Բարբի տիկնիկին, որի վաճառքների ծավալը վերջին տարիներին աճել է 20 տոկոսով:
«Հաշվարկված է, որ առաջին հերթին տիկնիկի նոր կերպարը պետք է գրավի մայրերի ուշադրությունը: Հնարավոր է` նրանց մոտ կարոտ առաջանա այն խաղալիքների նկատմամբ, որոնցով խաղացել են մանկության տարիներին ու որոնք նման չէին թեթևաբարո աղջիկներին: Թերթը մեջբերում է «Սինդի» բրենդի զարգացման փորձագետի խոսքերը:
Սինդի տիկնիկը Մեծ Բրիտանիայում հայտնվել է 1963թ. ու սկզբում ուներ «հաճելի դիմագծերով , վարդագույն շուրթերով ու փոքրիկ կրծքով» աղջկա տեսք, նշում է պարբերականն ու հավելում, որ նրա հագուստներն ու աքսեսուարները շլացրել են փոքրիկ աղջիկների երևակայությունը ու երկար ժամանակ եղել նրանց երազանքների առարկան:
Ընկերության գործերը վատացան, երբ այն բաց հակամարտության մեջ մտավ Բարբի արտադրող ամերիկյան Mattel-ի հետ:
Ներկայում ընկերությունը պատրաստել է 8 կերպար, որոնք պետք է Սինդիին վերադարձնեն «արմատներին», հաղորդում է թերթը:
