«Այն, ինչ ինձ հետ տեղի ունեցավ, ունի քաղաքական ենթատեքստ, սակայն այդ ենթատեքստը ես չեմ հաղորդել, քանի որ կուսակցական պատկանելություն չունեմ: Այդ դեպքերին քաղաքական ենթատեքստ են տվել՝ սկսած վարչապետից և ԿԳ նախարարից, մինչև որոշ լրատվամիջոցներ»,- լրագրողների հետ հանդիպմանն ասաց ԵՊԼՀ նախկին ռեկտոր Սուրեն Զոլյանը:
Նա նշեց, որ շատ շնորհակալ է քաղաքական կուսակցություններին, որոնք չքաղաքականացրին իրավիճակը և պահպանեցին իրենց չեզոք դիրքորոշումը մինչև վերջ. «Դա իշխանությունների դիքորոշումն է՝ կոծկել իրավական առումով իրենց ապիկարությունը»:
Նախկին ռեկտորի համոզմամբ՝ այս դեպքը խոսքի ազատության հստակ արտահայտված ճնշում է. «Մի իրավիճակ է ստեղծվել, երբ մարդն իրավունք չունի պատասխանելու և պաշտպանվելու, երբ «վերադասը» փորձում է կոպիտ ձևով խախտել օրենքները»։
Զոլյանը անդրադառնալով ՀՀ կառավարության նոր ծրագրին՝ ասաց. «Մասնավորապես՝ Կրթության և գիտության բաժնում բուհական կրթության վերաբերյալ կան ծիծաղելի սխալներ: Նշված է, որ «Բոլոնիայի գործընթացի շրջանակներում մեծացվելու է բուհերի ինքնուրույնությունը», մինչդեռ ինքնուրույնության փոխարեն պետք էր օգտագործել ինքնավարություն բառը»:
Հիշեցնենք, որ հուլիսի 2-ին, ժամը 14:30-ին, Կենտրոն և Նորք-Մարաշ վարչական շրջանների ընդհանուր իրավասության դատարանում տեղի կունենա ԵՊԼՀ նախկին ռեկտոր Ս. Զոլյանի հայցով հերթական դատական նիստն ընդդեմ ՀՀ ԿԳՆ-ի:
