Փետրվարի 8-ին Ֆրանսիայի Ազգային ժողովում տեղի ունեցավ Հայոց Ցեղասպանության մասին օրենքի ընդունման 10-ամյակին նվիրված միջոցառում, որին մասնակցել են Ֆրանսիայի Ազգային ժողովի պատգամավորներ, սենատորներ, Ֆրանսիայի մտավորական շրջանակների ներկայացուցիչներ:
Միջոցառման նախաձեռնողն էր Ազգային ժողովի «Ֆրանսիա-Հայաստան» բարեկամական խմբի փոխնախագահ, ԱԺ վարչական և ֆինանսաբյուջետային հարցերով խորհրդարանական բյուրոյի ղեկավար, իշխող` «Միություն հանուն ժողովրդական շարժման» (UMP) կուսակցության անդամ, Բուշ-դյու-Ռոնի դեպարտամենտից պատգամավոր ընտրված Ռիշար Մալյեն:
Հանդիսությանը բացման խոսքով հանդես եկավ Ֆրանսիայի Ազգային ժողովի «Ֆրանսիա-Հայաստան» բարեկամական խմբի նախագահ, ԱԺ արտաքին հարաբերությունների հանձնաժողովի փոխնախագահ, կառավարող կոալիցիայի մաս կազմող «Նոր կենտրոն» կենտրոնամետ աջ կուսակցության անդամ Ֆրանսուա Ռոշբլուանը: Նա գնահատեց տասնամյա վաղեմության իրադարձությունը և կարևորեց Հայոց ցեղասպանության ժխտման դեպքում քրեական պատիժ սահմանող օրինագիծը Ֆրանսիայի Սենատի կողմից առաջիկայում ընդունելու հանգամանքը:
Հանդիսավոր միջոցառմանը հանրագումարային և վերլուծական ելույթներով հանդես եկան ֆրանսիացի այլ պատգամավորներ, ֆրանսիահայ համայնքի ներկայացուցիչներ: Միջոցառման ավարտին ամփոփիչ խոսք ասաց Հայաստանի դեսպան Վիգեն Չիտեչյանը:
