«Հրապարակ»-ը գրում է, որ սպորտի և երիտասարդության նորանշանակ նախարարն Աժ-ում կառավարության ծրագրի քննարկման ընդմիջումներին չգիտեր ուր գնալ, ինչ անել, ակամայից անվերջ հայտնվում էր ԲՀԿ ֆրակցիայի դռների մոտ:
«Արյունը քաշո՞ւմ է»,- հարցրինք: «Չէ, ես անկուսակցական եմ, կապ չունեմ»: Շնորհավորե՞ց Գագիկ Ծառուկյանը Ձեզ նախարար դառնալու առիթով: «Այո՛»: Ի՞նչ մաղթեց: «Շնորհավորեց պարզապես»: Դո՞ւք ինչ ասացիք ի պատասխան: «Ես ասացի՝ շնորհակալություն»: Չէ, Դուք ասացիք՝ եթե ինձնից գոհ չլինեք, ես պորտֆելս վայր կդնեմ: «Գիտե՞ք ինչ, չորս օր ա՝ նախարար եմ, մեկդ չեկավ մի նորմալ հարցով դիմեր ինձ, հարցներ՝ ո՞նց եք նայում սպորտի զարգացմանը, մասսայական սպորտի զարգացմանը, մի գլուխ հարցնում եք՝ Ծառուկյանի հետ ոնց եք, ոնց չեք»:
Հա, իսկապես, ո՞նց եք-ո՞նց չեք: «Ես պարոն Ծառուկյանի հետ չեմ շփվում»: Նեղացա՞ծ եք: «Ո-ո՜չ, ո՛չ. խի՞ եք բան ման գալի»: Հիմա Դուք կառավարության կողմի՞ց եք, թե՞ կառավարությանն ուժեղ քննադատող ԲՀԿ-ի: «Ախր էլի ընենց հարցեր եք տալի, ես կառավարության անդամ եմ, բանավեճերի, քննադատության արդյունքում կառավարությունն ավելի համախմբված է դառնում, և մոտ ապագայում մենք ցույց կտանք, թե կառավարությունը որքան լավ է աշխատում, որքան համախմբված է, և դուք բոլորդ կհամոզվեք դրանում»: Ճի՞շտ է, որ Ձեր հայրը «Հազար ու մի մանրուքի» տնօրենն է եղել: «Իմ հայրս «Հազար և մի մանրուքի», խրուստալի, «Բենետոնի»՝ բոլորի տնօրենն է եղել»: «Զալատոյ մալչիկ» եք փաստորեն: «Ոնց կուզեք՝ համարեք»»:
