Եվրամիության իշխանությունները կարող են իրավունք ստանալ վերաշարադրել անդամ-երկրների ազգային բյուջեները, որոնք դուրս են գալիս դեֆիցիտի ու թույլատրելի պետական պարտքի առավելագույն սահմաններից:
Այսպիսի առաջարկություն է քննարկվելու ԵՄ` հունիսի 28-29-ը տեղի ունենալիք գագաթաժողովում: Այս մասին հայտնում է The Financial Times-ը:
Եվրահանձնաժողովը պատրաստում է համապատասխան հրահանգ` ԵՄ չափանիշներին համապատասխանեցնելու համար այն երկրների բյուջեները, որոնք խախտում են ստանձնած պարտավորությունը:
Վերաշարադրումը ձևականորեն պետք է ունենա խորհրդատվության տեսք, սակայն դրանք չկատարելու համար պետությանը սպառնում է պատիժ` ընդհուպ խոշոր տուգանքներ:
Եվս մեկ առաջարկ` պետպարտքի մակարդակի ամենամյա կոլեկտիվ հաստատում ու բյուջետային ծախսերի վերին շեմի հաստատում եվրոգոտու յուրաքանչյուր երկրի համար:
Պետությունը, որը որոշել է ավելացնել փոխառությունները, պետք է դիմի եվրոգոտու մյուս երկրներին`հավանության արժանանալու համար:
Նախօրեին փոփոխության համահեղինակները` Եվրամիության նախագահ Հերման վան Ռոմպեյը, Եվրահանձնաժողովի ղեկավար Ժոզե Մանուել Բառոզուն, ԵԿԲ ղեկավար Մարիո Դրագին ու Եվրախմբի նախագահ Ժան-Կլոդ Յունկերը հանդիպել էին փաստաթուղթը քննարկելու համար: