ԱԺ պատգամավոր Ռազմիկ Զոհրաբյանը դատապարտում է «Հարսնաքար» ռեստորանային համալիրում տեղի ունեցած միջադեպը: «Դա հանգստի վայր է, որտեղ պետք է հանգստանալ, ոչ թե ծեծի ենթարկվել: Այդ մշակույթը մեզ մոտ մի քիչ խեղված է: Մինչև վերջին բաժակը խմելու ավանդույթը դեռ պահպանվում է»,- ասաց Զոհրաբյանը՝ նշելով, որ Հայաստանում ռեստորանները շատ են:
Զոհրաբյանի խոսքով՝ երկրում կա իրավական համակարգ, գործը քննվում է, և մեղավորները պետք է պատժվեն:
«Առաջին լրատվական»-ի հարցին՝ հաշվի առնելով դատական համակարգի ներկայիս վիճակը՝ հավատո՞ւմ եք, որ մեղավորները արժանի պատիժ կստանան, Զոհրաբյանը պատասխանեց՝ դատական համակարգը անկախ է, և արժանի պատիժ պետք է ստանան նրանք, ովքեր հասարակական վայրում կարգ են խախտել:
Զոհրաբյանի գնահատականով՝ Ռուբեն Հայրապետյանը՝ «Հարսնաքարի» սեփականատերը, չի կարող պատասխանատվություն կրել կատարվածի համար: Նա նշեց, որ ՀՀԿ-ն հատուկ նիստ չի հրավիրել՝ քննարկելու համար «Հարսնաքարի» միջադեպը, բայց այդ հարցի շուրջ խոսակցություններ եղել են:
