Aravot.am-ի փոխանցմամբ, ադրբեջանական aze.az լրատվական կայքը տեղեկացրել է, որ հունիսի 20-ին Ադրբեջանի պետական հեռագրական գործակալությունում նամակ է ստացել 14-ամյա Դավիթ Դավթյանից, ով հայտնել է, որ Հայաստանում չի կարող կրթություն ստանալ, չի կարող հաղթահարել իր դեմ հարուցված խոչընդոտները և այդ պատճառով «իր փրկությունը որոնում է Հայաստանից դուրս»:
Իսկ հունիսի 22-ին նույն՝ «ԱզերԹաջ» գործակալությունում ստացվել է Դավթի մոր՝ Ֆելմիրա Դավթյանի նամակը: Ֆելմիրան օգնություն է խնդրել տարբեր երկրների կառավարություններից, այդ թվում՝ Ադրբեջանի կառավարությունից,նաև «Հեյդար Ալիև» հիմնադրամից, Ադրբեջանի ոչ կառավարական կազմակերպություններից և լրատվամիջոցներից: Ֆելմիրան գրել է. «Սարքված 300 դոլար կաշառքի համար ինձ 666 օր պահել են բանտում և ամեն կերպ ստորացրել են: Չեմ ապրելու այն երկրում, որտեղ կազմակերպել են այսպիսի ակցիա՝ «Միասին» և «Կաշառակերություն» կարգախոսների ներքո սև շրջանակում տեղադրել են իմ և հարևան երկրի նախագահի (Իլհամ Ալիևի) լուսանկարները: Փրկեցեք մեզ այս դժոխքից, այն պետությունից, որի բանտում ինձ 666 օր տանջել են: Ես ազատվել եմ միայն քաղաքակիրթ երկրների օգնությամբ: Եվ չնայած ես ազատվել եմ, ինձ արգելել են դեռ 666 օր հեռանալ երկրից:
Փրկեցեք մեզ այն պետությունից, որտեղ իմ տաղանդավոր տղային՝ 7 գրքերի հեղինակին զրկել են կրթություն ստանալու իրավունքից»: Հայկական պետություն և մշակույթի հանդեպ վիրավորանքներով համեմված այդ նամակի վերջում Ֆ. Դավթյանը հրապարակում է իր հետագա ծրագիրը. «Այս պետությունը ինձ և իմ երեխային դատապարտում է սովի՝ մեզնից գողանալով ամեն ինչ: Եվ եթե 666 օրից մենք հրաշքով կենդանի մնանք, բոլոր դեպքերում մեզ սպանելու են և մեզ սպանողներն արդարացվելու են, իբր եղել է ինքնապաշտպանություն: Ամեն րոպե մեզ կարող են զրպարտել: Ինձ համար հայկական էթնոսի ուսումնասիրությունը նույնքան կարևոր է, որքան 1915թ. Թուրքիայում տեղի ունեցած իրադարձություններինը: Ապացուցվող թեորեմը դժվար չէ մեկ անգամ ևս ապացուցել: Կարծում եմ, որ պարզ է, թե ինչու ինձ չի կարելի այս երկրից դուրս գալ: Փրկեցեք»:
«Առավոտ» օրաթերթը հիշեցնում է, որ ԵՊՀ Իջևանի մասնաճյուղի հեռակա ֆակուլտետի նախկին դեկան, Իջևան քաղաքի 52-ամյա բնակիչ Ֆելմիրա (Ֆեմիդա) Դավթյանը մի ուսանողից 300 դոլար կաշառք վերցնելու համար դատապարտվել է 3 տարի 6 ամիս ազատազրկման: 2011թ. փետրվարի 10-ից Ֆեմիդան ազատության մեջ է: Նրա նկատմամբ համաներում է կիրառվել, սակայն մինչև 2013թ. նա պիտի ներկայանա այլընտրանքային պատիժների կիրառման ծառայության աշխատակցին ու ստորագրի համապատասխան մատյանում: Ըստ օրենքի՝ նա կարող է կարճ ժամկետով բացակայել հանրապետությունից, ավելի երկար ժամկետով բացակայելու դեպքում նրա նկատմամբ հետախուզում կհայտարարվի: Թերթի հիշեցնում է նաև, որ Ֆ. Դավթյանը մտադիր էր 2012թ. մարտի 8-ին Երևանում ինքնահրկիզվել, սակայն ոստիկանները կանխել են նրա այդ փորձը:
