Դրամ-դոլար փոխարժեքի փոփոխությունը տնտեսության վրա արդեն զգացվում է: Ինչպես «Առաջին լրատվական»-ի հետ զրույցում նշեց 1994-1998թթ. ԿԲ նախագահ, տնտեսագետ Բագրատ Ասատրյանը, դրամի արժեզրկումը զգացվում է որոշ ապրանքատեսակների գների բարձրացման առումով, կամ այն ապրանքատեսակների գների չնվազման, որոնց գները միջազգային շուկայում էապես նվազել են:
Որպես օրինակ Բ. Ասատրյանը բերեց նավթի միջազգային գները. ապրիլի կեսերից 1 բարել նավթը 125 ԱՄՆ դոլարից իջել է 88-89 դոլարի, այսինքն՝ 30 և ավելի տոկոս, իսկ ՀՀ շուկայում բենզինի գինը նվազել է ընդամենը 2%-ով:
«Ներկայում ընդհանուր միջավայրը ոչ գնաճային է, գնաճային ճնշումները ցածր են, և մենք պետք է գների էական նվազում տեսնեինք, որը չենք տեսել»,- ասաց Բ. Ասատրյանը:
