Ադրբեջանական Vesti.az-ին տված հարցազրույցի ժամանակ վրացական «Արսենալի» անկախ ռազմա-վերլուծական հանդեսի գլխավոր խմբագիր, ռազմական փորձագետ Իրակլի Ալադաշվիլին անդրադարձել է Գյումրիում գտնվող ռուսական ռազմաբազայի ու Ղարաբաղյան հակամարտության խնդիրներին.
«Ռուսաստանը մտադիր է մինչև տարեվերջ կրկնապատկել Գյումրու 102-րդ ռազմաբազայում գտնվող իր զինծառայող-պայմանագրայինների քանակը: Ռուսաստանն ու Հայաստանը ռազմավարական գործընկերներ են, և ակնհայտ է, որ Ռուսաստանի կողմից Գյումրու ռազմաբազայի ուժեղացումը պետք է դիտարկվի որպես Հայաստանին ցուցաբերած աջակցության նշան:
Ռուսաստանի և Հայաստանի միջև կնքված ռազմավարական գործընկերության պայմանագրով ռուսական ռազմաբազան պարտավոր է օգնել Հայաստանին, եթե նա ենթարկվի հարձակման: Ի դեպ, դեռևս 1990-ական թվականներին Մոսկվայի ու Երևանի միջև առաջին պայմանագրով ենթադրվում էր Հայաստանին ռազմական օգնության ցուցաբերում, եթե նա հարձակման ենթարկվի Թուրքիայի ու Իրանի կողմից:
Ոչ վաղ անցյալում այդ երկու երկրներին հավելվեցին նաև Հայաստանի հարևաններ Ադրբեջանն ու Վրաստանը: Այնպես որ, եթե վերսկսվի Ղարաբաղյան պատերազմը, ապա Ռուսաստանն այդ պայամանգրով պետք է օգնի Հայաստանին: Չէ՞ որ Հայաստանը Ռուսաստանի ռազմավարական ամրակետն է Հարավային Կովկասում:
Վերջին տարիներին զգալիորեն ուժեղացվել են Ադրբեջանի զինված ուժերը: Դա վերաբերում է բոլոր զորատեսակներին: Ադրբեջանը միջոցներ չի խնայում ամենաժամանակակից զենքի գնման համար, ինչպես նաև արդեն իսկ սկսել է արտադրել մի շարք զինատեսակներ: Սակայն Հայաստանն էլ է ձեռք բերել ժամանակից սպառազինություն:
Երկու երկրների տրամադրության տակ առկա սպառազինությունը վկայում է, որ Ղարաբաղում նոր պատերազմը շատ ավելի արյունալի կլինի, քան՝ 1990-ական թվականներին էր: Սակայն ես կարծում եմ, որ պատերազմը չի վերսկսվի, իսկ եթե սկսվի էլ, ապա այն երկար չի տևի:
Ոչ ոք Ադրբեջանին ու Հայաստանին թույլ չի տա պատերազմել այնքան երկար, ինչքան 1990-ական թվականներին էր: Դրա համար էլ հակամարտող կողմերը պատերազմական կարճ ժամանակահատվածում կփորձեն իրենց ակտիվ մարտական գործողություններով հնարավորինս առաջ շարժվել հակառակորդի տարածքում»:
