Շաքարի մագնատ, ՀՀԿ-ական պատգամավոր Սամվել Ալեքսանյանը միանշանակ հերքում է, որ իրեն պատկանող Ախուրյանի շաքարի գործարանում աշխատավարձերի հետ որևէ խնդիր կա: «Առաջին լրատվական»-ի հարցին ի պատասխան, թե բողոքներ կան, որ աշխատավարձերը չեն վճարվում, ուշացվում են, Ալեքսանյանը հայտարարեց. «Ուրեմն, ես հիմա մաշնեն տամ, գնացեք գործարան, մի հատ մարդկանցից հատ-հատ հարցրեք, հըլը տեսեք՝ ո՞ւմ աշխատավարձն է ուշացել»:
Նրա խոսքով՝ տարբեր մարդիկ տարբեր չափի են աշխատավարձ ստանում, բայց ընդհանուր աշխատավարձերը բարձր են. «Քանի որ իրանք մշտապես չեն աշխատում, մենք բարձր ենք տալիս, որ իրանք չփախնեն: Իսկ որտեղից վերցրիր, որ մարդկանց փողը ուշացնում են: Ես էս քսան տարի ա զբաղվում եմ, հըլը մի օր, մի ժամ չի եղել, որ աշխատողների փողն ուշանա»:
Ս. Ալեքսանյանը նշեց, որ աշխարհում ոչ մի շաքարի գործարան 12 ամիս չի աշխատում: Նա հայտնեց, որ շաքարի ճակնդեղի 150 հազ. դոլարի սերմ ներկայումս պահեստում դրված է: «Ես ինչ անեմ, որ գյուղացիները չուզեցան ցանեն: Ասեցին՝ 35 դրամ թող տա, հետո 45 դրամ ուզեցին, գնացինք 45 դրամ էլ տվինք, սերմը բերեցինք… եթե չեք հավատում, արեք՝ մեր պահեստում նայեք` 150 հազ. դոլարի սերմը դրած, գյուղացիք չցանեցին, որովհետև գյուղացիք հեշտ ապրելու ձևը սովորել են: Չեն ուզում աշխատեն: Որ մի քիչ ավելի էլ տամ, չեն ցանի, էդ մարդիկ չեն ուզում ցանեն: Ոչ մի հեկտար չեն ցանել: Ցավդ տանեմ, իրանք հետ են սովորել, չեն ուզում աշխատեն: Կարտոշկի գինը լավ ա, հեսա մի երկու տարի կարտոշկա կցանեն, հետո կտենան՝ կարտոշկի գինը լավը չի, բազուկ կցանեն»,- ասաց Ս. Ալեքսանյանը` հավելելով, որ իր նախաձեռնությամբ ներկայումս փորձադաշտ է ստեղծվել, որտեղ փորձնական շաքարի ճակնդեղ են ցանել:
