Հայաստանը մի շարք բնագավառներում ոչ նպաստավոր պայմաններով ավելի ու ավելի վատ ցուցանիշներ է արձանագրում: Այսօր «Առաջին լրատվական»-ի հետ զրույցում նման տեսակետ հայտնեց ազգագրագետ Հրանուշ Խառատյանը՝ անդրադառնալով «Ձախողված պետությունների» 8-րդ տարեկան զեկույցին, որտեղ Հայաստանը տարածաշրջանում ամենալավ դիրքերն ունի և զբաղեցնում է 102-րդ հորիզոնականը: Զեկույցում տագնապ հարուցող երկրների ցուցանիշներին ավելի մոտ են Թուրքիան՝ 85-րդ տեղում, Ադրբեջանը՝ 68-րդ, Վրաստանը՝ 51-րդ տեղում:
Ազգագրագետ Հրանուշ Խառատյանը նշեց, որ այսօր թուրքերի հետ մասնավոր շատ է աշխատում, ուստի կարող է ասել, որ բնակչության մեծագույն մասը՝ հատկապես ինքնություն պահպանել ցանկացող խմբերը, ծանր կացության մեջ են իրենց խմբային գոյությունը պահպանելու իմաստով:
Նրա խոսքով՝ Ադրբեջանում ևս կան խնդիրներ. բոլոր տեսակի փոքրամասնությունները, լեզվական, կրոնական ցանկացած ինքնության դրսևորում թշնամանքով ընդունվող երևույթներ են: «Ավելին՝ ադրբեջանական ինքնությունը ծանր կացության մեջ է, և մարդիկ քաղաքական և մշակութային անորոշության մեջ են, ինչն էլ հարաբերություններում է արտահայտվում: Իսկ Հայաստանի այդ տեղը որքանով է օբյեկտիվորեն համապատասխանում Հայաստանի իրողություններին, չեմ կարող ասել: Սոցիալ-տնտեսական պայմանները տարածաշրջանում շատ հարաբերական երևույթներ են, այս պայմաններում վատթարագույն կողմն այն է, որ մարդն ինքն իրեն արժանապատվորեն ռեալիզացնելու որևէ հնարավորություն Հայաստանում չունի»,- մեկնաբանեց Հրանուշ Խառատյանը՝ շարունակելով, որ այսօր եթե դու իշխանության մասը չես և եթե հատուկ հովանավորություն չունես իշխանությունից, չունես քեզ ռեալիզացնելու հնարավորություն:
Ազգագրագետի խոսքով՝ սա շատ տխուր ցուցանիշ է, և մեր հասարակության զգալի մասը մեր աչքի առաջ շարունակվում է դեգրադացվել, ավելին՝ երկրի պետական տնտեսական քաղաքականությամբ, այսինքն՝ հիմնականում հանքարդյունաբերությամբ, բնական հարստությունների գերշահագործմամբ և ոչնչացմամբ, անտառահատումներով, ջրի նվազեցմամբ և մեր կյանքի մյուս բնագավառներում ոչ նպաստավոր պայմաններով, ցավոք սրտի, ավելի ու ավելի վատ ցուցանիշներ ենք ունենում:
