ԱԺ արտահերթ նիստում այսօր վարչապետ Տիգրան Սարգսյանին դիմեց ՀԱԿ պատգամավոր Արամ Մանուկյանը՝ ասելով. «Իշխանությունների «ջանքերի» շնորհիվ այս տարի Հայաստանից օդային ճանապարհով 69 հազար մարդ է հեռացել, այն դեպքում, երբ անցած տարի այդ թիվը 65 հազար էր:
Ընդ որում, հեռացողների մեծ մասն արտագնա աշխատանքի մեկնողներ չեն»,- ասաց նա՝ հարց հնչեցնելով, թե ինչպե՞ս կգնահատի վարչապետին, ով արտագաղթի մասին խոսելիս ասում է՝ կրիտիկական զանգվածը մնա, որ հեղափոխությո՞ւն անի:
Ի պատասխան՝ ՀՀ վարչապետը նկատեց, որ արտագաղթը կանխելու լուծումները մի քանիսն են, այն է՝ քաղաքացիներին ապահովել աշխատատեղերով, ստեղծել բարենպաստ միջավայր մարդկանց կեցության համար և արդարության մթնոլորտ ապահովել:
«Միաժամանակ պետք է փաստել, որ բոլոր այս ոլորտներում բացթողումներ կան»,- փաստեց Տիգրան Սարգսյանը:
Արամ Մանուկյանն, այնուամենայնիվ, վարչապետից պահանջեց պատասխանել կրիտիկական զանգվածի մասին իր հարցին, ինչին ի պատասխան՝ Տիգրան Սարգսյանն ասաց. «Տիգրան Սարգսյանը երբևէ նման արտահայտություն չի արել: Թերթը, որ նման խոսքեր էր տպագրել, ներողություն է խնդրել իմ չասած և ընդամենն իրենց կողմից գրված խոսքերի համար: Այսինքն՝ գործչին չպետք է վերագրել խոսքեր, որոնք նա չի ասել»:
