Իտալիայի դատախազությունը երկուշաբթի պահանջել է երկրի նախկին վարչապետ Սիլվիո Բեռլուսկոնիին դատապարտել 3 տարի 8 ամիս ազատազրկման՝ կապված իր հիմնադրած Mediaset հոլդինգի հարցում ֆինանսական խարդախությունների հետ:
Ինչպես հաղորդում է Reuters-ը, մեղադրող կողմը նաև պահանջել է հոլդինգի նախագահ Ֆեդելե Կոնֆալոնիերիին դատապարտել 4 տարվա ազատազրկման:
Բեռլուսկոնին, Կոնֆալոնիերին և հոլդինգի ղեկավարության այլ անդամներ մեղադրվում են այն բանում, որ օֆշորների միջոցով արտասահմանյան ֆիլմեր և հեռուստահաղորդումներ ցուցադրելու իրավունք են գնել, իսկ հետո այն ցածր գնով վաճառել մեդիահոլդինգին: Այդ ճանապարհով, ըստ մեղադրող կողմի, 1994-1999 թթ. ամերիկյան ըներությունից նրանք ձեռք են բերել 470 մլն եվրո ընդհանուր արժողությամբ ֆիլմերի և հեռուստահաղորդումների իրավունք:
Օֆշորների միջոցով ցածր գներով հեռուստահեռարձակման իրավունքի ձեռքբերումը թույլ է տվել ոչ միայն խուսափել հարկերից, այլև ստեղծել անօրինական հիմնադրամներ, որոնք օգտագործվել են Բեռլուսկոնիի քաղաքական քարոզարշավի ֆինանսավորման համար:
Նախկին վարչապետը և Mediaset-ի գործով մյուս մասնակիցները կտրականապես հերքում են իրենց մեղքը: Mediaset-ի գործով հաջորդ դատավարությունը տեղի կունենա հուլիսի 2-ին:
Հիշեցնենք. Իտալիայի դատարանը քննում է Բեռլուսկոնիի դեմ ևս երկու գործ: Նախկին վարչապետը կասկածվում է անչափահաս մարմնավաճառի հետ սեռական հարաբերություններ ունենալու, ինչպես նաև իշխանության չարաշահման և պետական գաղտնիքը խախտելու մեջ:
