Ոմանց համար ամառային հանգիստն արդեն իրականություն է, իսկ նրանք, ովքեր դեռ հանգստի տարբերակներ են փնտրում, առաջարկում ենք ծանոթանալ արտագնա և ներգնա հանգստի առաջարկներին` գնացուցակին, առավել մատչելի և հարմար հանգստի ուղղություններին:
«Առաջին լրատվական»-ի հետ զրույցում «Tour Centre»-ի օպերատոր Ռուզաննա Թովմասյանն ասաց, որ հայաստանցիների նախընտրելի հանգստի ուղղություններն են Բուլղարիան, Կիպրոսը, Վրաստանը և Անթալիան: Ըստ նրա` կան մարդիկ, որոնց համար նախընտրելի հանգիստը եվրոպական երկրներում է՝ Իսպանիայում և Իտալիայում, սակայն նրա հավաստիացմամբ՝ ամենամատչելի գներն են տրամադրում Անթալիան և Վրաստանը, հետո` Կիպրոսն ու Բուլղարիան:
Անթալիայում 7-օրյա հանգստի փաթեթը մեկ անձի համար, ներառյալ՝ ճանապարհածախսը, ուտելիքը, արժե 700-800 դոլար, իսկ ամենաթանկը եվրոպական ուղղություններն են` 1500-2000 եվրո:
«Միքստուր» ՍՊԸ–ի տնօրեն Կոնստանտին Սաթյանը նշեց, որ արդեն մի քանի տարի է՝ հանգստի առավել մատչելի տարբերակներ է առաջարկում Վրաստանը: «Բնականաբար, Վրաստանն է համեմատաբար էժան և մեծամասնությամբ այս ուղղությամբ են մեկնում հանգստի: Ես չեմ կարող ասել՝ այս տարի միջոցնե՞րն են սուղ, թե ինչ պատճառներ կան, բայց փաստը մնում է փաստ, որ մեր մշտական հաճախորդները գնում էին ավելի լուրջ, ավելի լավ տեղեր հանգստանալու, օրինակ` Թուրքիա կամ Թունիս, այսօր նախընտրում են ավելի քիչ գումար ծախսել և գնալ Վրաստան»,- մանրամասնեց Կոնստանտին Սաթյանը:
Հայաստանի ներգնա հանգստի վերաբերյալ տեղեկություններ է պարբերաբար թարմացնում Hotels.am կայքը: Այստեղ յուրաքանչյուրը կարող է գտնել հանրապետության բոլոր հանգստյան տների, առողջարանների, հյուրանոցների գնացուցակը և այլ մանրամասներ: «Առաջին լրատվական»-ի հետ զրույցում կայքի աշխատակից Լիլիթ Գևորգյանը նկատեց, որ նախորդ տարիների համեմատ՝ հանգստի ավելի քիչ թվով մարդիկ են մեկնում, քանի որ հանգիստը կախված է քաղաքացիների բյուջեից. թե ով ինչքան գումար է կարող է նախատեսել հանգստի համար: Ըստ Լիլիթ Գևորգյանի` եթե ֆինանսապես ավելի ապահով են, նախընտրում են հանգստանալ Ջերմուկում, Դիլիջանում, իսկ եթե մատչելի տարբերակներ են փնտրում, ապա ավելի մոտ, որովհետև ճանապարհածախսը ևս հավելյալ գումար է: «Ավելի մատչելի հյուրանոցներ հնարավոր է գտնել մոտակա հանգստավայրերում` Աղվերանում, Հանքավանում: Ջերմուկում ևս կարելի է մատչելի տարբերակ գտնել: Հունիս ամսվա համար 7–օրյա սննդով և բուժումով տարբերակը մեկ անձի համար մինիմալ տարբերակով կազմում է 105 հազար դրամ»,- տեղեկացրեց Լ. Գևորգյանը` հավելելով, որ այս գները հունիսից հետո թանկանում են, և այս նույն փաթեթը հուլիս ամսին արժենում է 120 հազար դրամ:
Hotels.am-ի աշխատակցի խոսքերով` Ջերմուկում ևս կան մինիմալ տարբեակներ, իսկ շատ ավելի թանկ տարբերակներ են շքեղ հյուրանոցներով և պայմաններով Ծաղկաձորում և Դիլիջանում:
