Հունաստանի «Նոր ժողովրդավարություն» պահպանողական կուսակցությունը քվեաթերթիկների 66%-ի մշակման արդյունքներով հավաքել է ընտրողների ձայների 30.1%-ը և խոհրդարանում կստանա 130 մանդատ: Այս մասին հաղորդում է Associated Press-ը:
Ձախ ծայրահեղական «Սիրիզա» կոալիցիան հավաքել է ձայների 26.5%-ը և կստանա 70 տեղ, իսկ սոցիալիստական ՊԱՍՕԿ-ը՝ 34 տեղ՝ 12.6%-ով:
«Նոր ժողովրդավարությունը» և «Սիրիզան» խիստ տարբերվում են Եվրամիության հետ համագործակցության և նրանցից ստացվող ֆինանսական օգնության հարցում իրենց դիրքորոշումներով: Պահպանողականները հանդես են գալիս 240 մլրդ եվրո ֆինանսական օգնությունը ստանալու և ԵՄ կազմում մնալու օգտին: Ձախ ծայրահեղականները կոչ են անում հրաժարվել են ֆինանսական օգնության համաձայնագրից և վերջին երկու տարիներին մտցված կոշտ տնտեսական քաղաքականությունից:
Մեկնաբանելով ընտրություննեի արդյունքները՝ «Սիրիզա»-ի և ՊԱՍՕԿ-ի առաջնորդները ընդունել են ընդդիմադիր կուսակցության հաղթանակը, սակայն հրաժարվել են նրա հետ կոալիցիա կազմել: Դիտորդները մտավախություն ունեն, ու կարող է կրկնվել մայիսի սկզբին ստեղծված իրավիճակը՝ երբ ընտրություններից հետո կառավարություն ձևավորելու շուրջ բանակցությունները փակուղի մտան, և նոր ընտրությունների կարիք առաջացավ:
