Թեև ԿԲ-ն համարում է, որ 2010թ. բարձր գնաճին համախառն պահանջարկի աճի նպաստման չափը նշանակալի չէ, սակայն 2011-ի գնաճը զսպելու համար նախատեսում է խստացնել դրամավարկային քաղաքականության պայմանները: Այս մասին լրագրողների հետ հանդիպման ժամանակ այսօր ասաց ԿԲ դարավարկային քաղաքականության վարչության պետ Արթուր Ստեփանյանը:
Նա նշեց, որ 2010թ. առևտրային բանկերի կողմից տրամադրված վարկերի ծավալը աճել է 210 մլրդ դրամով, ինչը բավականին մեծ ցուցանիշ է: Սա զուգորդվել է վարկային բոլոր տեսակի պորտֆելների տոկոսադրույքների նվազմամբ: Սակայն, ըստ Ստեփանյանի, եթե 2010թ. վարկավորման ծավալների այս էական աճը չի հանգեցրել համախառն պահանջարկի աճով պայմանավորված գնաճի, ապա դա չի նշանակում, որ եթե 2011-ին էլ վարկավորման նման մեծ ծավալի աճ լինի (200-250 մլրդ դրամի չափով), ապա դա չի հանգեցնի գնաճային լուրջ ճնշումների:
Այդ պատճառով էլ ԿԲ-ն այնպիսի քաղաքականություն է իրականացնելու, որ 2011-ին վարկավորման ծավալները աճեն շատ ավելի քիչ չափով, քան 2010թ. այդ 210 մլրդ դրամ աճն էր: «Վարկային միջոցների աճը 2011-ին ավելի քիչ չափով կլինի, քան 2010-ին եղավ և հնարավոր է որոշակի տոկոսադրույքների բարձրացում վարկային պրոդուկտների մասով, ինչը որ թույլ է տալու համախառն պահանջարկի մասով լրացուցիչ գնաճային ճնշումների չդրսևորմանը կամ մեղմմանը»,- հայտարարեց Ա. Ստեփանյանը:
Որպես դրամավարկային քաղաքականության պայմանների խստացման օրինակ Ստեփանյանը նշեց վերջերս ԿԲ•ի կողմից արտարժույթով ներգրավված միջոցների պարտադիր պահուստավորմավ նորմայի մեջ (12%) դրամային չափաբաժինը 6%-ից 9% դարձնելը: Սա մի քայլ է, որն ուղղված է դոլարիզացիայի մակարդակը նվազեցնելուն, իսկ դոլարիզացիայի մակարդակի նվազուը մեծացնում է ԿԲ-ի գործիքների կիրառման ազդեցության ուժգնությունը: