Թուրքիայի վարչապետ Ռեջեփ Թայիփ Էրդողանը և Սիրիայի նախագահ Բաշար Ալ-Ասադը կարճատև հանդիպում են ունեցել Հալեպում: Էրդողանը այստեղ է ժամանել, որպեսզի մասնակցի Ալ-Ասի (Օրոնտես) գետի վրա կառուցվելիք ջրամբարի հիմնարկեքին:
Տեղեկացնենք, որ երկու երկրները տասնամյակներ շարունակ ջրային ռեսուրսների բաշխման խնդիրներ են ունեցել: Այս խնդիրները երբեմն պատերազմի շեմին են հասցրել Թուրքիային և Սիրիային: Սակայն վերջին 10-12 տարիների ընթացքում կողմերը համատեղ ծրագրեր են մշակել սույն խնդրին լուծումներ տալու համար:
Էրդողանի պատվիրակության մեջ է եղել նաև արտգործնախարար Ահմեդ Դավութօղլուն: Հանդիպումից հետո երկրների ղեկավարները հանդես են եկել համատեղ հայտարարությամբ, որում անդրադարձել են տարածաշրջանային վերջին զարգացումներին: «Մենք կարծում ենք, որ անվտանգությունն ու կայունությունը Եգիպտոսում կվերականգնվի մոտ ապագայում: Եգիպտոսի ժողովրդի պահանջներին և սպասումներին պետք է լուծումներ տրվեն»,- ասված է հայտարարության մեջ:
Անդրադառնալով Լիբանանի ներքաղաքական զարգացումներին` Էրդողանն ու Ասադը հայտարարել են, որ կանեն առավելագույնը, որպեսզի Լիբանանը մոտ ժամանակներս հասնի կայունության, անվտանգության և բարգավաճման: Կողմերը հատուկ անդրադարձ են կատարել երկկողմ հարաբերություններին. «Մեր տնտեսական համագործակցությունը կամրապնդի թուրք և սիրիացի ժողովուրդների բարեկամությունը: Դա նաև կնպաստի տարածաշրջանի այլ ժողովուրդների կայունությանն ու անվտանգությանը»,- ասված է հայտարարության մեջ:
Այս մասին հաղորդում է Anadolu գործակալությունը:
