Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին բանկային սեկտորին կոչ է արել զգուշավորություն ցուցաբերել հիփոթեկային վարկեր տրամադրելու ու դրանք հետ ստանալու ընթացքում. «Ինձ հայտնի է, որ բանկերը վարկերը չմարելու պատճառով մարդկանցից խլում են նրանց բնակարանները՝ այդ մարդկանց թողնելով ապրել բաց երկնքի տակ:
Արդյունքում, մենք ունենում ենք բնակչության մի մեծ խումբ, որոնց դուք վերածել եք աղքատների: Մի՛ արեք այնպես, որ ձևավորվի սովյալների ու ոչնչացվածների դաս: Զգու՛յշ եղեք, այլապես կստանաք հակաբանկային տրամադրվածություն: Մի՛ ընկեք մանր շահույթի հետևից: Չի կարելի շահույթ ստանալ մեկին աղքատ դարձնելու հաշվին:
Բանկերը պետք է նվազեցնեն տոկոսադրույքները: Բոլորիս քաջ հայտնի է, որ տոկոսադրույքները շատ բարձր են: Կարծում եմ, որ բոլորս պետք է աշխատենք այդ ուղղությամբ, որպեսզի փոքր ու միջին բիզնեսն ապահովենք դրանցով: Տոկոսադրույքները պետք է նվազեցվեն, որ վարկ վերցնելն իմաստ ունենա»:
Սաակաշվիլին հավելել է, որ Վրաստանում նկատվում է ներդրումների աճ:
