Ս.թ. հունիսի 13-ին Ժնևի ՄԱԿ-ի գրասենյակում ՀՀ մշտական ներկայացուցիչ Շառլ Ազնավուրը հանդիպել է Միգրացիայի միջազգային կազմակերպության գլխավոր տնօրեն Ուիլյամ Սվինի հետ: Հանդիպմանը մասնակցել է նաև աշխատանքային այցով Շվեյցարիայում գտնվող ՀՀ Սփյուռքի նախարար Հրանուշ Հակոբյանը:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ գլխավոր տնօրենը ներկայացրել է կազմակերպության ընդհանուր գործունեությունը և Հայաստանում իրականացվող ծրագրերը: Երկուստեք գոհունակություն է հայտնվել կազմակերպության հետ Հայաստանի Հանրապետության համագործակցության ընթացքից:
Հանդիպման ընթացքում անդրադարձ է եղել Սփյուռքի և միգրացիայի թեմաներին: Գլխավոր տնօրենը տեղեկացրել է, որ աշխարհի 26 երկրներ ունեն Սփյուռքի նախարարություններ, և որ ՄՄԿ-ն 2013թ. գարնանը նախատեսում է կազմակերպել Սփյուռքի նախարարների հանդիպում, որին հրավիրել է մասնակցելու նաև տիկին Հակոբյանին:
ՀՀ Սփյուռքի նախարարը տեղեկացրել է, որ 2011թ-ին Հայաստանում արդեն իսկ կազմակերպվել է նմանատիպ մի համաժողով` «Սփյուռքի հեռանկարները գլոբալացվող աշխարհում» խորագրով, որին մասնակցել են ներկայացուցիչներ աշխարհի 18 երկրներից և իր պատրաստակամություն հայտնել` հայկական փորձը, համաժողովի ամփոփիչ զեկույցը և այլ անհրաժեշտ տեղեկատվությունը տրամադրել կազմակերպությանը:
Հ.Հակոբյանը ներկայացրել է հայկական սփյուռքի ձևավորման պատմությունը, արդի խնդիրները և հայրենիք-սփյուռք փոխհարաբերությունները:
Հանդիպման ավարտին դեսպան Ազնավուրը և նախարար Հակոբյանը կազմակերպության գլխավոր տնօրենին հրավիրել են այցելել Հայաստան, ինչին պարոն Սվինը արձագանքել է պատրաստակամությամբ:
