Իտալիայի առաջնության 22-րդ տուրի մեկնարկային խաղում «Ուդինեզե»-ն 2։0 հաշվով պարտության մատնեց «Սամպդորիա»-ին, մրցաշարային աղյուսակում շրջանցեց «Ռոմա»-ին ու բարձրացավ 6-րդ հորիզոնական։ Շաբաթ օրը կայացած մյուս խաղում «Յուվենտուս»-ը հյուրընկալվելիս 1։3 հաշվով հաղթեց «Կալյարի»-ին՝ այդպիսով ընդհատելով անհաջող հանդիպումների շարքը։
Առաջատար «Միլան»-ը երկրորդ անընդմեջ ոչ ոքին խաղաց՝ այս անգավ հյուրընկալվելիս 1։1 հաշվով ավարտեց «Ջենոա»-ի հետ հանդիպումը և արդեն երկրորդ տեղում ընթացող «Նապոլի»-ին ընդամենը երեք միավորով է գերազանցում։ «Նապոլի»-ն իր հերթին պարտության մատնեց «Չեզենա»-ին. հերթական անգամ գոլի հեղինակ դարձավ Էդիսոն Կավանին, որը խփած 18 գնդակով գլխավորում է ռմբարկուների ցուցակը։
Տուրի կենտրոնական հանդիպումը կայացավ Ջուզեպպե Մեացցայի անվան մարզադաշտում, որտեղ գերազանց մարզավիճակ ձեռք բերած «Ինտեր»-ն ընդունել էր «Ռոմա»-ին։ Երկու թիմերն էլ առաջինից մինչև վերջին րոպեն բաց խաղ ցուցադրեցին։ Արդեն երրորդ րոպեին Սնեյդերը գեղեցիկ հարվածով բացեց հանդիպման հաշիվը, տասը րոպե անց Սիմպլիսիոն հավասարեցրեց այն։ 35-րդ րոպեին Էտոոն կրկին առաջ մղեց չեմպիոնին։ 62-րդ րոպեին Բուրդիսսոն վերջին հույսի խախտման համար հեռացվեց խաղադաշտից։ Էտոոն դիպուկ իրացրեց 11-մետրանոց հարվածը։ 8 րոպե անց Մոտտան հաշիվը դարձրեց խոշոր` 4:1: Թվում էր՝ միլանցիները հեշտ հաղթանակ կտոնեն, բայց 10 հոգով մնացած փոխչեմպիոնին հաջողվեց 6 րոպեում երկու գնդակ ուղարկել չեմպիոնի դարպասն ու կրկին վերադարձնել խաղի ինտրիգը (Վուչինիչ 75, Լորիա 81)։ Ավելին անել «Ռոմա»-ին չհաջողվեց, իսկ մրցավարի կողմից ավելացված ժամանակում Կամբիասսոն խփեց այս խաղի վերջին գնդակը` «Ինտեր»-«Ռոմա»` 5։3։
22-րդ տուրի մյուս հանդիպումներում գրանցվեցին հետևյալ արդյունքները` «Բոլոնիա»-«Կատանիա»` 1։0, «Բրեշիա»-«Բարի»` 2։0, «Լացիո»-«Կևո»` 1։1, «Լեչե»-«Պալերմո»` 2։4, «Պարմա»-«Ֆիորենտինա»` 1։1։