Աշխարհի ամենահարուստ մարդը` մեքսիկացի Կառլոս Սլիմը գնել է վերջերս ազգայնացված արգենտինական ընկերության` YPF-ի 8.4 տոկոս ակցիաները: Այս մասին հայտնում է AFP-ն: Գործարքի գումարը չի հրապարակվում:
Ավելի վաղ YPF-ի նկատմամբ հսկողությունը պատկանում էր իսպանական Repsol-ին, սակայն 2012թ. սկզբին արգենտինական կառավարությունը` երկրի նախագահ Քրիստինա Կիրշների գլխավորությամբ որոշում կայացրեց ընկերության ազգայնացման վերաբերյալ:
Պատճառների թվում նշվում էր իսպանական ընկերության զարգացման հարցում ներդրումների ծավալների անբավարար քանակությունը:
Բացի այդ` երկրի իշխանությունները մեղադրում են Repsol-ին այն բանում, որ YPF-ն մեծ կորուստներ է կրել, իսկ ստացված միջոցները դուրս են բերվել երկրից:
Մայիսի 4-ին Արգենտինայի խորհրդարանը քվեարկեց YPF-ի ազգայնացման օգտին: Իսպանական ընկերությունն իր հերթին, հայտարարեց, որ կդիմի միջազգային արբիտրաժ ու որպես փոխհատուցում՝ YPF –ում իր մասնաբաժնի համար կպահանջի 10 մլրդ դոլար:
