Այս տարվա սկզբից զբոսաշրջության ոլորտի պատասխանատուները կանխատեսել և նպատակ էին դրել ապահովել 10 % աճ: Ինչպես «Առաջին լրատվական»-ին հայտնեց ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը, եռամսյակով 9 % անկումը ներկայում վերականգնվում է. «Դա պայմանավորված էր Իրանում տարադրամի իրարանցման հետ կապված արտագնա զբոսաշրջության անկմամբ, բայց կարծես կարգավորվում է: Հիմա ընդհանուր առմամբ բավականին ակտիվություն է նկատվում և, հուսով ենք, որ նպատակին կհասնենք»:
Ի պատասխան հարցին՝ խնդիրը միայն տարադրա՞մի հետ էր կապված, թե՞ մեր երկիրն ավելի քիչ գրավիչ է դարձել իրանցի զբոսաշրջիկների համար, Մ. Ապրեսյանը պնդեց, որ հիմնական պատճառը դրամն էր, և Հայաստանի գրավչությունը չի նվազել: Ըստ նրա՝ Իրանից արտագնա զբոսաշրջությունն ամբողջովին զգալի նվազել էր՝ կապված տարադրամի հետ:
Մ. Ապրեսյանի խոսքերով՝ տարեցտարի աճում է նաև ներքին զբոսաշրջությունը: Ոլորտի մրցունակությունը բարձրացնելու համար, վարչության պետի կարծիքով, պետք է զարգացնել ենթակառուցվածքները: ՀՀ-ն բացառիկ է որպես առաջին քրիստոնյա երկիր, որը կապված է նաև Նոյի լեգենդի հետ, իսկ ծառայությունների մասով ՀՀ-ն հարևանների համեմատ բավականին առավելություն ունի՝ կադրերի առումով:
Միաժամանակ, Մ. Ապրեսյանը վստահեցրեց, որ, օրինակ, Վրաստանի համեմատ, Հայաստանում զբոսաշրջային ծառայությունների գները բոլորովին էլ բարձր չեն:
Հիշեցնենք, որ 2011թ. հանրապետություն էին ժամանել 757 հզ. 935 զբոսաշրջիկներ կամ 2010 թ. նույն ժամանակահատվածի նկատմամբ ցուցանիշն աճել էր 10.3 %-ով: Անցած տարի զբոսաշրջության նպատակով հանրապետությունից մեկնել էր 714 հզ. 953 մարդ կամ 2010 թ. նույն ժամանակահատվածի նկատմամբ ցուցանիշն աճել էր 10.2 %-ով:
