Հանգստյան օրերին կայացավ Անգլիայի առաջնության այս մրցաշրջանի ամենաարդյունավետ տուրը. 43 գնդակ 10 խաղում:
Կենտրոնական հանդիպումն անկասկած տեղի ունեցավ Լոնդոնի «Սթենֆորդ Բրիջ» մարզադաշտում, որտեղ «Չելսի»-ն ընդունել էր «Լիվերպուլ»-ին: Հանդիպումը հետաքրքիր էր ոչ միայն այն պատճառով, որ միմյանց դեմ խաղում էին երկու գերակումբներ, որոնք բոլորովին վերջերս են լավ մարզավիճակ ձեռք բերել, այլև այսօր «Ազնվականներ»-ի կազմում առաջին անգամ խաղադաշտ դուրս եկավ Ֆերնանդո Տորեսն, ով դեռ երկու տուր առաջ հանդես էր գալիս «Լիվերպուլ»-ի մարզաշապիկով: Հավասար և բավական լարված պայքարում անցած խաղում ամեն ինչ վճռեց Աբրամովիչի թիմի պաշտպունների գործած մեկ կոպիտ սխալը, ինչից վարպետորեն օգտվեց «Կարմիրներ»-ի պորտուգալացի կիսապաշտպան Ռաուլ Մերեյլեշը: Այս հաղթանակից հետո «Լիվերպուլ»-ը բարձրացավ վեցերորդ հորիզոնական:
Կիրակի օրը կայացած մյուս հանդիպումը նույնպես ավարտվեց հյուրերի նվազագույն հաշվով հաղթանակով: Ավրաամ Գրանտի «Վեսթ Հեմը» զիջեց «Բիրմինգհեմ»-ին և նահանջեց մրցաշարային աղյուսակի վերջին հորիզոնական:
Դե իսկ այն, ինչի ականատեսը եղանք շաբաթ օրը, թերևս դեռ երկար չենք տեսնի:
«Նյուքասլ»-«Արսենալ»` 4:4: Այս հանդիպման արդյունքը կարող էր նաև սենսացիոն չհամարվել, եթե Արսեն Վենգերի սաներն արդեն 3-րդ րոպեին 0:2, իսկ 26-րդին 0:4 հաշվով հաղթելիս չլինեին (Ուոլքոթ 1”, Ջուրու 3”, վան Պերսի 10”, 26”): Դեռ առաջին խաղակեսում «Զինագործներ»-ը կարող էին ևս 4 գնդակ ուղարկել Սթիվեն Հարփերի դարպասը. նպաստավոր դիրքերից վրիպեցին նույն վան Պերսին, Ֆաբրեգասն ու Արշավինը: Երկրորդ խաղակեսում ամեն ինչ գլխիվայր շրջվեց: Ամեն ինչ սկսվեց Աբու Դիաբիի ստացած կարմիր քարտից հետո: Առաջին պատասխան գնդակը տանտերերը խփեցին 67-րդ րոպեին` մրցավարի նշանակած կասկածելի 11 մետրանոց հարվածից: 8 րոպե անց Բեսթը դարձավ իր թիմի երկրորդ գոլի հեղինակը: Եվս 8 րոպե հետո «Նյուքասլ»-ին կրկին օգնության հասավ հանդիպման գլխավոր մրցավար Ֆիլ Դաուդը, ով երկրորդ անգամ կասկածելի 11 մետրանոց նշանակեց լոնդոնցիների դարպասին: Ինչպես և առաջին դեպքում, Բարթոնի հարվածն անվրեպ ստացվեց: Հանդիպման վերջակետը դրեց փոխարինման դուրս եկած Տիոտեն: Իհարկե, մրցավարն օգնեց Ալան Փարդյուի սաներին, բայց «Նյուքասլ»-ն արժանի էր այս մեկ միավորին, թեկուզ միայն ցուցաբերած կամքի համար:
Նույն օրը ևս մեկ խաղում 8 դարպասի գրավում արձանագրվեց. «Էվերտոն»-ը, որը 65-րդ րոպեին 2:3 հաշվով պարտվում էր «Բլեքփուլ»-ին, հանդիպման ավարտին մնացած 25 րոպեում կարողացավ 3 անպատասխան գնդակ ուղարկել մրցակցի դարպասն ու հաղթանակ տարավ 5:3 հաշվով: Տանտերերի կազմում չորս գոլի հեղինակ դարձավ Լուիս Սահան, ով Թիերի Անրիից հետո դարձավ երկրորդ ֆրանսիացին, ում հաջողվեց պոկեր ձևակերպել Անգլիայի առաջնությունում:
Ամենաանսպասելի արդյունքը գրանցվեց «Վուլվերհեմփթոն»-«Մանչեթեր Յունայթեդ» խաղում: «Կարմիր սատանաներ»-ն այս մրցաշրջանում կրեցին իրենց առաջին պարտությունը և այն էլ մրցաշարային աղյուսակը եզրափակող «Վուլվերհեփթոն»-ից: Հանդիպման 3-րդ րոպեին հաշիվը բացեց Նանին: Ընդամենը յոթ րոպե անց «Գայլեր»-ի պաշտպան Ջորջ Էլոկոբին հավասարեցրեց այն, իսկ 40-րդ րոպեին տանտերերի հարձակվող Քեվին Դոյլն առաջ մղեց իր թիմին: Մինչև հանդիպման ավարտն Ալեքս Ֆերգյուսոնի սաներն այդպես էլ չկարողացան ճեղքել «Գայլեր»-ի խիտ պաշտպանությունը` «Վուլվերհեփթոն»-«Մանչեթր Յունայթեդ»` 2:1:
«Մանչեսթեր Սիթի»-ն, Տևեսի հեթ տրիկի շնորհիվ, 3:0 հաշվով պարտության մատնեց «Վեսթ Բրոմվիչ»-ին:
Մյուս հանդիպումներում գրանցվեցին հետևյալ արդյունքները` «Տոտենհեմ»-«Բոլթոն»` 2:1, «Սթոուք»-«Սանդերլենդ»` 3:2, «Ասթոն Վիլլա»-«Ֆուլհեմ»` 2:2, «Ուիգան»-«Բլեքբըրն»` 4:3: