Հենց Արզաքանցյանները ոտքները քաշել են ռեստորանից, Ալբերտին պատիվ են տվել, հետո «պատին» տվել` հակաճառելու համար… Եվ քյավառցիների տրամադրությունն այնքան լավ է եղել, որ չեն իմացել ու չեն միջամտել: Վերջում են հասել, երբ Ալբերտն արնաշաղախ, անգիտակից ընկած է եղել, ատամները` շնչափողում ու ստամոքսում… Բայց հասցրել են տեղափոխել հիվանդանոցի վերակենդանացման բաժանմունք…
Գեղարքունիքի մարզի Գավառ քաղաքի բնակիչներ Ալբերտ Ղարիբյանը, Լևոն Զախարյանը, Արամ և Բաբկեն Արզաքանցյանները, Կարեն Տոնոյանը, Դավիթ Գոզեյանը 2011 թ. մայիսի 21-ին, երեկոյան միասին գնացել են Գավառ քաղաքում գտնվող «Բերկուտ» ռեստորան: Այնտեղ նրանց է միացել նաև Արսեն Խաչիկյանը: Նստել են ռեստորանի ընդհանուր սրահում և գինի ու ուտելիք պատվիրել: Մոտ կես ժամ հետո Արամ Արզաքանցյանն իր ավտոմեքենայով ազգական Բաբկենին տուն է տարել, իսկ մյուսները մնացել են ռեստորանում` ժամանակ անցկացնելու: Զրույցի ընթացքում 21-ամյա Լևոնն ասել է, թե Գավառ քաղաքի «Կաբելի դար» կոչվող թաղամասի բոլոր աղջիկներն անբարոյական են: Ալբերտն էլ, իմանալով, որ այնտեղ նաև բարոյական աղջիկներ կան, ասել է` ինչո՞ւ է Լևոնը բոլորին «բ.զ» անվանում, իր բարեկամներն ու էլի շատ աղջիկներ են բնակվում այդ թաղամասում, որոնք բարոյական են: Բայց Լևոնը կամ չի համոզվել, կամ չի ցանկացել, որ որպես տղա` իրեն «սխալ հանեն», ու ինչ է արել. արհամարհելով ռեստորանի այցելուներին` «ցանկացել է» ապացուցել, որ «Կաբելի դարում» տնական աղջիկ չկա: Բայց դրա համար ոչ թե աղջիկներին է շարք կանգնեցրել, խոսեցրել ու «փորձել», այլ համոզելու կարճ ճանապարհն է ընտրել. Աբոյին ասել է. «Դու էդքան տղա ես դարձել, որ իմ խոսքին խոսք ես բերում` հակաճառո՞ւմ: Եթե ասում եմ, ուրեմն այդպես է»: Ալբերտը կրկին ճշտել է` «իմ բարեկամներին է՞լ ես «բ.զ» անվանում»: Լևոնը սկզբում հանգիստ պատասխանել է, որ եթե ասում է, ուրեմն դա այդպես է, իսկ հետո գոռալով` 10-15 րոպե շարունակել է համոզել: Բայց տեսնելով, որ չի համոզվում, էլի հակաճառում է, արհամարհական ձևով երկու մատներով բռնելով Ալբերտի հագուստից` նրան ռեստորանից դուրս է հանել և հենց մուտքի դռան մոտ, աստիճանահարթակի վրա հայհոյանքներ տալով` բռունցքներով հարվածել է Ալբերտին` վերջինիս առողջությանը պատճառելով կյանքին վտանգ սպառնացող ծանր վնաս: Իսկ երբ նկատել է, որ ընկերները մոտեցել են Ալբերտին, հեռացել է և փորձել փախչել` Մոսկվա:
Կատարած հանցանքի համար Լևոն Զախարյանին մեղադրանք է առաջադրվել Քրեական օրենսգրքի 112-րդ հոդվածի 2-րդ մասի 9-րդ կետով` դիտավորությամբ առողջությանը ծանր վնաս հասցնելու համար: Սակայն դատարանում Լևոնը չի ընդունել մեղքը և ցուցմունքում նախ նշել է, որ քյավառցուն «անհարիր» պահվածքով է սկսել դեպքի օրը. մայիսի 21-ին Այրիվանքից տղերքով եկել են Բերկուտ: Տղերքը խմել են, իսկ ինքը չի խմել, «ստից» բաժակը վերցրել, տարել է բերանի մոտ, որ չնեղանային: Խոսակցություն է եղել մի աղջկա մասին: Լևոնի պատմելով` տուժողը հարբած վիճակում հարցրել է` «ինչի՞ ես հորեղբորս աղջկան բան ասում», ինքն էլ ասել է` քո հորեղբոր աղջկա հետ ինչ գործ ունեմ, որ մի հատ էլ բան ասեմ: Հետո տուժողը բերել-մատներն էր ճտճտացրել դեմքի մոտ, իսկ հետո իրեն կանչել է դուրս: Տուժողն ասել է` պիտի ներողություն խնդրես հորեղբորս աղջկան բան ասելու համար: Ինքն էլ ասել է. «գժվե՞լ ես, ես քո հորեղբոր աղջկա հետ ինչ գործ ունեմ, որ ներողություն խնդրեմ»: Սկսել են քաշքշել, կախվել է շորերից և սկսել ճղել: Այնուհետև բրթել է և ասել. «հանգստացի, ի՞նչ ես անում, դոշերս թող», ըտենց գնդիգլոր ընկել է: Այնուհետև քաշվել է մի կողմ` մինչև տղերքը եկել, վերցրել են, դրել մեքենան ու տարել: Հետո գնացել է տուն, ասել` շուտ արեք, «պասպորտը» տվեք: Վերցրել է անձնագիրը և շորերը, զանգել է Մոսկվա. պետք է փող ուղարկեին, հետաձգվում էր, որոշել է ինքը գնալ ու փող բերել, որովհետև որ հիվանդին մտցնում են հիվանդանոց, դա արդեն փող է: Գնում էր Մոսկվա, որ փող վերցնի, ետ գա, գնացել, նստել է տաքսի ու շարժվել Երևան: Հասել է օդանավակայան, հաշվառումն անցել, սակայն ոստիկանները բռնել ու բերել են հարազատ Գավառի բաժին:
Ու թեև Լևոնը դատարանում չի ընդունել առաջադրված մեղադրանքը և ասել է, որ իրեն դատապարտեն իր կատարածի համար, այդուհանդերձ` Գեղարքունիքի մարզի առաջին ատյանի դատարանը նրան մեղավոր է ճանաչել:
Տուժող Ալբերտ Ղարիբյանն էլ ցուցմունք է տվել, որ մայիսի 21-ին ինքն ու ընկերները որոշել էին գնալ Այրիվանք, քանի որ հաջորդ օրը քննության էին: Արամ Արզաքանցյանը խանութից գինի ու թխվածք է վերցրել, և նրա «Նիվա» մակնիշի ավտոմեքենայով գնացել են եկեղեցի, մոմ վառել, գինի են խմել, ինքն ընդամենը մեկ բաժակ գինի է խմել, և ընկերներով նորմալ, առանց վիճաբանելու ժամանակ են անցկացրել: Հետո եկել են Բաբկեն Արզաքանցյանն ու Լևոն Զախարյանը, վիսկի են բերել, և երեկոյան բոլորը միասին գնացել են «Բերկուտ» ռեստորան, որտեղ ինքը մի քանի կում գինի է խմել: Իսկ երբ աղջիկների մասին է խոսք բացվել, Լևոնը մի թաղի աղջիկների մասին ասել է, թե այդտեղ բոլորը անբարոյականներ են, ինչին ինքը հակաճառել էր… Մոտ 5-10 րոպե անց Լևոնն իրեն հանել է դուրս, բռնել վզից, խփել է պատին և ասել, որ կխեղդի: Այնուհետև խփել է քթին, կրծքավանդակին, դուրս գալուց խփել է պարանոցին, բռնել և խփել է պատին, հետո ասել է` կսպանի, իսկ դրանից հետո բան չի հիշում: Մի քանի օր հետո արթնացել է հիվանդանոցում և իմացել, որ կոտրվածքներ է ստացել: Ալբերտի հարազատները, մտերիմները բժշկից իմացել են, որ տղայի ծնոտը կոտրված է, հետո եկել է մասնագետ, և երկու ատամ են հանել շնչափողից, ասել են` ճակատը, քիթը կոտրված են, նաև` վզի հիմքը:
Այդուհանդերձ, դատարանը վճռել է` ամբաստանյալ Լևոն Արմենի Զախարյանին մեղավոր ճանաչել քր. օր.-ի 112-րդ հոդվածի 2-րդ մասի 9-րդ կետով և դատապարտել ազատազրկման 5 տարի ժամկետով: Դատարանը միաժամանակ տուժողին իրավունք է վերապահել վնասի հատուցման պահանջով քաղաքացիական հայց հարուցել:
Դատավճռի դեմ վերաքննիչ բողոք է բերել տուժողի ներկայացուցիչը և պահանջում է ավելի խիստ պատժի դատապարտել ամբաստանյալին:
