Ադրբեջանական Salam News գործակալության փոխանցմամբ՝ Ադրբեջան այցելած ԵԱՀԿ գործող նախագահ Էյմոն Գիլմորը հանդիպել է Ադրբեջանի փոխխոսնակ Բահար Մուրադովայի հետ:
Հանդիպման ժամանակ Գիլմորը հայտարարել է, որ իրենց մեծապես անհանգստացնում է վերջին օրերին հայ-ադրբեջանական շփման գծում գրանցված լարվածությունը, և որ անհրաժեշտ է շուտափույթ միջոցներ ձեռնարկել լարվածության վերացման համար: Գիլմորն անընդունելի է համարել շփման գծում տիրող լարվածությունը՝ ընդգծելով, որ հակամարտող կողմերը պետք է ջանքեր գործադրեն իրավիճակի կարգավորման ուղղությամբ:
Գիլմորը հավելել է, որ Ղարաբաղյան հակամարտության կարգավորումը հնարավոր չէ իրականացնել ուժային ճանապարհով, և որ միակ տարբերակը խաղաղ ճանապարհով կարգավորումն է, թեև դա կարող է երկար ժամանակ պահանջել, սակայն չպետք է հետ կանգնել այդ ուղուց: Գիլմորը նաև առաջարկել է բարելավել երկու երկրների լրագրողների միջև հարաբերությունները:
