ՀՀ գյուղնախարարության բուսաբուծության և բույսերի պաշտպանության վարչության պետի պաշտոնակատար Գևորգ Հարությունյանը այսօր լրագրողների հետ հանդիպմանը խոսեց գյուղատնտեսության նախարարության կողմից իրականացված մի շարք ծրագրերի մասին՝ առանձնացնելով 2012-ին իրականացված մի ծրագիր, որի շրջանակներում ՀՀ է ներկրվել շուրջ 12 հազար տոննա դիզելային վառելիք և 25 տոննա պարարտանյութ, որոնք վաճառվել են շուկայականից մատչելի գներով:
Գևորգ Հարությունյանը ներկայացրեց նաև ՀՀ աշնանային ցորենի սորտավորման ծրագիրը, որի հիմնական նպատակն էր հանրապետության ցորենի սորտերի թարմացումը և սերմնարտադրությունը, քանի որ երկար տարիներ երկրում օգտագործվել են անհայտ վերարտադրության սերմեր:
Հարությունյանի խոսքերով՝ այժմ գյուղնախարարությունը իրականացնում է պահպանության միջոցառումների ծրագիր, որի շրջանակներում պայքարի միջոցառումներ են իրականացվում կրծողների և մորեխների, ինչպես նաև անտառային հիվանդությունների դեմ. «Պայքարի աշխատանքները մեկնարկել են այսօրվանից, իրականացվելու են Կապանի, Վայոց ձորի և Հրազդանի անտառտնտեսություններում: Մինչև ամսվա վերջ կավարտվեն բոլոր աշխատանքները»:
Միջոցառումների ընթացքում բնակիչների մուտքը անտառ պետք է արգելվի: Աշխատանքները ավարտելուց 20 օր հետո կարող են ազատ մուտք ունենալ բնակիչները:
Բանախոսը նաև ավելացրեց, որ այս տարի ծիրանի բերքը կգերազանցի անցյալ տարվան, ինչը պայմանավորված է պտղատուների համար բարենպաստ եղանակային պայմաններով, իսկ կնվազե՞ն արդյոք գները՝ վերջինս որևէ կարծիք չհայտնեց:
