Դեռևս 1990–ական թվականներին Երևան քաղաքի Սիլիկյան, Չարբախ թաղամասերում և նախկին Հաղթանակ գյուղի տարածքում շուրջ 1600 ընտանիքների հողատարածքներ են հատկացվել։
ՀՀ կառավարությանն առընթեր անշարժ գույքի կադաստրի պետական կոմիտեի կողմից վերը նշված տարածքների քաղաքացիների կողմից մինչև 2005թ. ընդունվել են դիմումներ և կատարվել են պետական գրանցումներ։ Երևանի քաղաքապետարանի ունեցած տվյալներով, մինչ օրս 41 միավոր պետական գրանցում է ստացել։
Հետագայում նշված հողամասերի համար գլխավոր հատակագծեր տրամադրելու անհրաժեշտություն է առաջացել, ուստի քաղաքացիները դիմել են Երևանի քաղաքապետարան՝ հողամասերի հատկացման հիմքերը վերականգնելու և հողամասերի համար հատակագծեր թողարկելու խնդրանքով։
Երևանի քաղաքապետ Կարեն Կարապետյանի հանձնարարությամբ վերսկսվել է գործընթացը։ Բնակչության հողհատկացումների հարցը հնարավորինս արագ կարգավորելու նպատակով ստեղծված հանձնաժողովի աշխատանքները
համակարգում է քաղաքապետի տեղակալ Վահագն Առաքելյանը։
Հանձնաժողովի տվյալներով ՝ 2005թ.-ից մինչ օրս Երևանի քաղաքապետարանի կողմից նշված տարածքներում իրականացվել են քաղաքացիներին հատկացված 256 միավոր հողամասերի հողհատկացման հիմքերի վերականգնում։
Խնդիրն ունի բարդություններ , քանի որ շատ դեպքերում չեն պահպանվել տրամադրված հողամասերի նախկին ուրվագիծը, հողի տեսքը, փաստաթղթերի բնօրինակները։
Տարածքներում առկա են համադրումներ, հողօգտագորման հետ կապված հարևանների վեճեր, քաղաքաշինական նորմերի խախտումներ։
Ներկայում համակողմանիորեն ուսումնասիրվում են շուրջ 900 ընտանիքների հարցերը։ Հաղթանակ գյուղում հողահատկացումների օրինականությունը հանձնաժողովը կուսումնասիրի առանձին։
Վերը նշված տարածքների շուրջ երեք տասնյակ քաղաքացիներ քաղաքապետարան են հրավիրվել։ Նրանց իրազեկվել է գործնթացի և հարցին ընթացք տալու մասին։ Տեղեկացվել է, որ բոլոր այն դեպքերում, երբ պահպանվել են փաստաթղթերը, հողամասերի ուրվագծերը, չեն առաջանում քաղաքաշինական նորմերի խախտումներ, չկան համադրումներ և հիմքերը բավարար են՝ քաղաքապետարանը պատրաստակամ է ընդառաջել քաղաքացիներին և սեղմ ժամկետում տրամադրել համապատասխան փաստաթղթեր։ Իսկ եթե մերժվի քաղաքացու դիմումը, ապա մերժումը կլինի համակողմանի հիմնավորված և պարզաբանված։
Երևանի քաղաքապետարան
