Վրաստանի ԱԳՆ–ն ռուսական իշխանություններին մեղադրել է ՌԴ-ում ապրող էթնիկ վրացիների իրավունքները խախտելու նոր քարոզարշավ սկսելու մեջ: Ինչպես հաղորդում է BBC-ն, առիթը դարձել է ՌԴ Միգրացիայի դաշնային ծառայության ղեկավար Կոնստանտին Ռոմոդանովսկու հայտարարությունը` ներգաղթյալների ստուգման և գրանցման միջոցառումները խստացնելու վերաբերյալ:
Համաձայն վրացական ԱԳՆ հայտարարության՝ ՌԴ-ում սկսվել է մարդու իրավունքների հերթական զանգվածային խախտումների ալիքը: Զանգվածայնորեն խուզարկություններ են կատարվում ընդդիմության ներկայացուցիչների և այլ դիրքորոշում ունեցող մարդկանց տներում և գրասենյակներում։ Ձերբակալությունների, ֆիզիկական բռնությունների միջոցով դադարեցվում են նրանց գործողությունները:
Հիշեցնենք, որ ավելի վաղ Կոնստանտին Ռոմոդանովսկին հայտարարել էր նաև, որ Վրաստանի ավելի քան 9 հազար քաղաքացի ապօրինի է գտնվում ՌԴ տարածքում :
«Հավանաբար մենք կգտնենք այդ մարդկանց և ինչ-որ որոշում կկայացնենք»,- ասել է Ռոմոդանովսկին: Նա հավելել է, որ նրանք շուտով, ամենայն հավանականությամբ, կկանգնեն դատարանի առջև:
