Հունիսի 11-ից ԼՂՀ պաշտոնական պատվիրակությունը՝ Ազգային ժողովի նախագահ Աշոտ Ղուլյանի գլխավորությամբ, գտնվում է Մեծ Բրիտանիայի և Հյուսիսային Իռլանդիայի Միացյալ Թագավորության մայրաքաղաք Լոնդոնում:
«Պատվիրակության կազմում են մշակույթի և երիտասարդության հարցերի նախարար Նարինե Աղաբալյանը և արտաքին գործերի նախարարության բազմակողմ հարաբերությունների վարչության պետ Արմինե Ալեքսանյանը: Պատվիրակությունը Լոնդոն է ժամանել հայ-բրիտանական բարեկամության բազմակուսակցական խորհրդարանական խմբի հրավերով:
Այցի առաջին աշխատանքային օրը Միացյալ Թագավորության Լորդերի պալատում ԼՂՀ պատվիրակությունը մասնակցել է հայ-բրիտանական բարեկամության խմբի տարեկան ժողովին, որն այս տարի հոբելյանական էր` ի նշանավորումն խմբի կազմավորման 20-ամյակի: Բացելով հանդիպումը՝ հայ-բրիտանական բարեկամության խմբի ղեկավար բարոնուհի Քերոլայն Կոքսը ողջունել է Արցախի ներկայացուցիչներին և իր տպավորությունները ներկայացրել է վերջերս Արցախ կատարած այցելությունից:
Պատասխան խոսքում Արցախի խորհրդարանի նախագահ Ա. Ղուլյանը ողջունեց բրիտանացի խորհրդարանականներին և շնորհակալություն հայտնել նրանց` Արցախի ժողովրդի հոգսերով ապրելու, երիտասարդ հանրապետությանն ըստ ամենայնի աջակցելու և տարբեր ծրագրերի իրականացման գործում իրենց ներդրումը բերելու համար: Այնուհետև նա բրիտանացի խորհրդարանականներին ներկայացրեց Արցախի հանրապետության քսան տարիների ձեռքբերումներն ու հաջողությունները` պետականաշինության, տնտեսական զարգացման և ժողովրդավարական արժեքների արմատավորման ու ամրապնդման գործում, ղարաբաղյան հիմնախնդրի կարգավորման ներկա փուլի ու հնարավոր զարգացումների մասին ղարաբաղյան կողմի տեսակետները և պատասխանել ներկաների հարցերին:
Հանդիպմանը մասնակցում էր նաև Միացյալ Թագավորությունում ՀՀ դեսպան Կարինե Ղազինյանը, ով նույնպես իր շնորհավորական խոսքն է ուղղել բրիտանացի պատգամավորներին:
Հունիսի 12-ին ԼՂՀ Ազգային ժողովի նախագահ Աշոտ Ղուլյանը ելույթ ունեցավ Լոնդոնի համալսարանի Արևելքի և Աֆրիկայի ուսումնասիրությունների ինստիտուտում` «Կովկասում կայունության և առաջընթացի հեռանկարները. խաղաղությունը և պետականաշինության գործընթացը Լեռնային Ղարաբաղում» թեմայով: Հանդիպմանը մասնակցում էին դասախոսներ և ուսանողներ, ինչպես նաև Լոնդոնի հայ համայնքի ներկայացուցիչներ: Բանախոսությունից հետո Արցախի խորհրդարանի նախագահը պատասխանել է ներկաների հարցերին, որոնք վերաբերում են ղարաբաղյան հիմնախնդրի շուրջ բանակցային գործընթացին, տարածաշրջանային համագործակցության խոչընդոտներին, հետխորհրդային տարածքի երկրների միջև կապերին, ԼՂՀ-ում իրականացվող բարեփոխումներին և օտարերկրյա ներդրումների պաշտպանվածությանը:
Այնուհետև ԼՂՀ Ազգային ժողովի նախագահ Աշոտ Ղուլյանի պատվին, Միացյալ Թագավորությունում ՀՀ դեսպանի մասնակցությամբ, Մեծ Բրիտանիայում Հայ Առաքելական Եկեղեցու թեմակալ առաջնորդ Վահան եպիսկոպոս Հավհաննիսյանի նախաձեռնությամբ կազմակերպվել է ընդունելություն, որին հրավիրված էին բրիտանահայ կառույցների ղեկավարները: ԼՂՀ պատվիրակության անդամներն իրենց խոսքում կարևորել են Սփյուռքի հայկական կազմակերպությունների համակողմանի աջակցությունը, ինչի շնորհիվ Արցախը հաջողությամբ դիմագրավում է ներկա մարտահրավերները և շեշտադրել են դրանք շարունակելու անհրաժեշտությունը: Պատվիրակության այցը Լոնդոն շարունակվում է:
