ԱՄՆ դաշնային ընտրական հանձնաժողովը թույլատրել է քարոզարշավների համար հանգանակություններ կատարել բջջային հեռախոսներից և այլ նման սարքերից տեքստային հաղորդագրություններ ուղարկելու ճանապարհով: Այս մասին հաղորդում է Politico-ն:
Նման որոշում հանձնաժողովը կայացրել է հունիսի 11-ին՝ միաձայն: Այն ուժի մեջ է մտնում անհապաղ, սակայն նման հանգանակությունների համար տեխնիկական հնարավորությունների ապահովման համար դեռ որոշակի ժամանակ կպահանջվի: Հանգանակությունների գումարը սահմանափակվում է 50 դոլարով: Դա առավելագույն գումարն է, որ ԱՄՆ-ում կարելի է անանուն հանգանակել ընտրարշավի համար:
Նման համակարգ այս պահին օգտագործում են բարեգործական կազմակերպությունները: Նշված համարին որոշակի հաղորդագրություն ուղարկելու դեպքում գանձնվում է սահմանված գումարը:
The Wall Street Journal թերթի հրապարակման մեջ ասվում է, որ նման հանգանակությունների նկատմամբ հետաքրքրություն են ցուցաբերել նախագահ բարաք Օբամայի և նրա մրցակից Միթ Ռոմնիի շտաբերը:
Փորձագետների գնահատականներով՝ ընտրական հանձնաժողովի այդ որոշումը հնարավորություն կտա ոչ մեծ եկամուտով ամերիկացիներին առավել ակնհայտ ազդեցություն ունենալ քաղաքական գործիչների վրա:
