Գերմանացի զինվորականները Բալթիկ ծովի ընդերքից կբարձրացնեն նացիստական JU 87 Stuka ռմբակոծիչի կմախքը: Այս մասին հայտնում է Associated Press-ը՝ հղում անելով կապիտան Սեբաստիան Բանգերտին, որը ղեկավարում է օպերացիան՝ Դրեզդենի ռազմական պատմության թանգարանի անունից: Ներկայում աշխարհում գոյություն ունի այդ օդանավի երկու օրիգինալ օրինակ, որոնք ներկայացված են Լոնդոնի և Չիկագոյի թանգարաններում:
JU 87 Stuka-ն Բալթիկ ծովի ընդերքում հայտնաբերվել էր 1990-ականներին, սակայն այն վեր բարձրացնելու աշխատանքները սկսել են միայն հիմա: Այդ ընթացքում ջրասուզակները ջրից դուրս են բերել օդանավի առանձին մասերը, այդ թվում՝ շարժիչը: Սպասվում է, որ այսօր կհաջողվի 18 մետր խորությունից վեր բարձրացնել կորպուսը:
Փորձագետների տվյալներով՝ ինքնաթիռը լավ է պահպանվել, չնայած 70 տարի եղել է ծովի ընդերքում: Թանգարանի ներկայացուցիչները պատրաստվում են այն լիովին վերականգնել և ներկայացնել Բեռլինի ռազմաօդային ուժերի թանգարնում: Ներկա պահին ինքնաթիռի պատմության մասին տեղեկություններ չկան: Ըստ կորպուսի վրա զետեղված սերիական համարի՝ մասնագետները կպարզեն, թե ով է այն վարել, և ինչ հանգամանքներում է օդանավը վթարվել:
JU87 ռմբակոծիչները առաջին անգամ ռազմական գործողություններում կիրառվել են 1936-1939 թթ. Իսպանիայում քաղաքացիական պատերազմի ժամանակ: Գերմանացի ֆաշիստները նրանց օգնության են ուղարկել Իսպանիայում ֆաշիստական շարժմանը: Հետագայում Stuka ռմբակոծիչները կիրառվել են երկրորդ աշխարհամարտի ժամանակ:
