ՀՀ կառավարության ծրագրի հիմնադրույթները հինգերորդ գումարման խորհրդարանի անկախ պատգամավոր Էդմոն Մարուքյանի հետ դեռևս չեն քննարկվել: Այս մասին «Առաջին լրատվական»-ին տեղեկացրեց անկախ պատգամավոր Էդմոն Մարուքյանը:
Նա նկատեց, որ մինչ այս պահը որևէ մեկն իր հետ չի կապվել վարչապետի հետ հանդիպման պայմանավորվածություն ձեռք բերելու համար: Էդմոն Մարուքյանը կայանալիք որևէ հանդիպման մասին տեղեկություն չունի, բայց մամուլից տեղյակ է, որ նորընտիր վարչապետը հանդիպել է խմբակցությունների ներկայացուցիչների հետ՝ ճշտելու նրանց դիրքորոշումը ՀՀ կառավարության ծրագրային հիմնադրույթների վեաբերյալ:
«Այսօր խորհրդարանում երկու անկախ պատգամավոր կա, որոնցից մեկը ես եմ, և քանի որ ԱԺ-ում մենք որևէ խմբակցության մեջ ներգրավված չենք, հետևաբար կարծում եմ՝ ծրագիրը ներկայացվելուց առաջ մեզ հետ ևս պետք է քննարկվի: Եթե մենք առաջարկներ ունենանք, որպես անկախ պատգամավոր, մեր առաջարկները ևս պետք է հաշվի առնվեն: Քանի դեռ ես այդ ծրագրից տեղեկություն չունեմ, իմ դիրքորոշումը չեմ կարող հայտնել և քվեարկել:
Ես այն մարդն եմ, ով ծրագիրն անպայման կարդալու է, որովհետև չունեմ խմբակցություն, չունեմ կուսակցություն, որն ինձ կհրահանգի, կասի՝ կողմ կամ դեմ քվեարկի ծրագրին. ես ինքս եմ որոշելու՝ ինչպես իմ դիրքորոշումն արտահայտեմ կառավարության ծրագրի վերաբերյալ»,- մանրամասնեց անկախ պատգամավորը` շարունակելով, որ պետք է մանրամասն ուսումնասիրի, համեմատի կառավարության ծրագիրն իր ծրագրի հետ, հասկանա, թե կառավարությունը ինչ ռազմավարական ուղղություններ է նախանշել մեր երկրի զարգացման համար:
Էդմոն Մարուքյանը նաև չբացառեց, որ հարցեր կբարձրացնի՝ կապված հենց իր քաղաքի՝ Վանաձորի հետ, որովհետև իր ընտրողները լուրջ սպասելիքներ ունեն իրենից: Պատգամավորի խոսքով` տարբեր խնդիրներ կան ծառացած, որոնց լուծումը ՏԻՄ ուժերից վեր է, այսինքն` այդ հարցերը պետք է լուծվեն կառավարության մակարդակով:
Հիշեցնենք, որ ՀՀ վարչապետի հրավերով ՀՀ կառավարության ծրագրի հիմնադրույթները քննարկվել են խորհրդարանական խմբակցությունների ղեկավարների և ներկայացուցիչների հետ: Քննարկմանը խմբակցությունները հանդես են եկել իրենց առաջարկներով կամ պայմանավորվել են իրենց դիրքորոշման մասին հայտնել ծրագրին ամբողջովին ծանոթանալուց հետո:
Նշենք, որ ՀՀ կառավարության ծրագիրը մշակվել է կոալիցիոն քաղաքական ուժերի` ՀՀԿ-ի և ՕԵԿ-ի նախընտրական ծրագրերի հիման վրա` համաձայն 2012 թ.-ի մայիսի 30-ին կնքված կոալիցիոն հուշագրի:
