ԵԽԽՎ-ում ԼՂ հարցերով ենթահանձնաժողովի աշխատանքները վերսկսելու հարցի առնչությամբ ԱԺ ՀՅԴ խմբակցության պատգամավոր Հրայր Կարապետյանը կարծիք հայտնեց, որ եթե մեր բանակը, իր բոլոր թերություններով հանդերձ, մեծ առավելություններ ունի, նույնը չի կարելի ասել հայկական դիվանագիտության մասին.
«Մեր դիվանագիտությունը Արցախի հարցում հետ է մնացել մեր զինված ուժերի հաղթանակից, դիվանագիտության մեջ մենք հետընթաց ենք գրանցում: ԵԽԽՎ-ում ԼՂ հարցով ենթահանձնաժողովի ստեղծման որոշումը բացարձակապես չի համապատասխանում մեր շահերին, ՄԽ-ը նույնպես հասկացել է, որ այս ենթահանձնաժողովի գոյությունն ու ենթադրվող զուտ քաղաքական գործունեությունը խանգարելու են բուն գործընթացին»:
Կարապետյանի գնահատմամբ, ՄԽ-ից դուրս ընդունվող բոլոր դեկլարատիվ փաստաթղթերը «ջուր են լցնում ադրբեջանական ջրաղացին». «Ադրբեջանը հոխորտում է այդ դեկլարացիաներով և խուսափում բուն Մինսկի խմբում աշխատելուց, որն էլ, ի վերջո, արդյունք է բերելու»:
Հրայր Կարապետյանի գնահատմամբ, այս ամենի պատճառն այն է, որ ՀՀ իշխանությունները ժամանակին Չավուշօղլուի «դեմը չառան». «Երբ որ նա եկավ Հայաստան և Եղեռնի հուշահամալիր չայցելեց, հենց այն ժամանակ մենք պետք է բոյկոտեինք թե՛ իրեն և թե՛ իր բոլոր նախաձեռնությունները: Մեր արտգործնախարարը չքննադատեց այս երևույթը, որովհետև սա կոպիտ խախտում էր այն երկրի կանոնների, որտեղ նա գտնվում էր»:
Լուսանկարը` PanarmenianPhoto-ի