Այսօր Europe1 ռադիոկայանին տված հարցազրույցում Արաբական երկրների լիգա կազմակերպության նախագահ, եգիպտացի Ամր Մուսան հայտարարել է, որ չի կարծում, թե Հոսնի Մուբարաքը ժամանակից շուտ հրաժարական կտա: «Չեմ կարծում, որ նա կգնա: Կարծում եմ՝ նա կմնա մինչև օգոստոսի վերջը»,- ասել է Մուսան Europe1-ին:
Միաժամանակ նա չի բացառել, որ հաջորդ նախագահական ընտրությունների ժամանակ կարող է առաջադրել իր թեկնածությունը` հաստատելով նախորդ օրերին հայտնված այն տեղեկատվությունը, համաձայն որի, նա պատրաստվում է ակտիվ դերակատարություն ստանձնել ներքաղաքական կյանքում: «Ես, անկասկած, պատրաստ եմ ծառայել իմ երկրին, սակայն անհրաժեշտ է նայել, թե ինչպես կզարգանան իրադարձությունները»,- նշել է նա:
Ամր Մուսան միջազգային շրջանակներում և Եգիպտոսում շատ հայտնի քաղաքական գործիչ է: 1991-2001 թթ. եղել է Եգիպտոսի արտաքին գործերի նախարարը, իսկ 2001 թ. ստանձնել է Արաբական երկրների լիգա համաարաբական կազմակերպության նախագահությունը: Կարծիքներ կան, որ Ամր Մուսայի առաջադրումը անհրաժեշտ է, որպեսզի ընդդիմադիր դաշտը «հագեցած» լինի պրո-արևմտյան ուժերով: