Ադրբեջանական APA լրատվական գործակալության փոխանցմամբ՝ Ադրբեջանի փոխվարչապետ, փախստականների ու հարկադիր վերաբնակների հարցերով պետական կոմիտեի նախագահ Ալի Հասանովը լրագրողների հետ զրույցում անդրադարձել է վերջին օրերին հայ-ադրբեջանական շփման գծում գրանցված միջադեպերին.
«Ես այդ միջադեպերը համարում եմ միայն սադրանք: Կարծում եմ, որ ԱՄՆ պետքարտուղար Հիլարի Քլինթոնի Հայաստան այցելելը չի գոհացնում Հայաստանին հովանավորող երկրին: Հակամարտության կարգավորման բանալին գտնվում է Ռուսաստանի ձեռքում:
Արդեն 20 տարի է, ինչ ԵԱՀԿ Մինսկի խմբի համանախագահող երկրները երկու երկրներին կոչ են անում հրաժարվել պատերազմից: Դրա հետ մեկտեղ նրանք որևէ քայլ չեն ձեռնարկում տվյալ ուղղությամբ: Հայտարարություններ անելը հեշտ է:
Բայց ի՞նչ քայլ են ձեռնարկել այդպիսի հայտարարություն անողները: Ի՞նչ աշխատանքներ են տարել նրանք այդ ուղղությամբ: Նրանց հայտարարությունները միայն դատարկ խոսքեր են: Ադրբեջանի նախագահը բազմիցս հայտարարել է, որ Ադրբեջանը երբեք չի հաշտվի այս դրության հետ: Եթե Հայաստանը չփոխի իր դիրքորոշումը, ապա Ադրբեջանի զինված ուժերը կարող են յուրաքանչյուր պահին ռազմական գործողություններ սկսել»:
