Վրացական Georgia Today պարբերականում հոդված է տպագրվել Կովկասում Ռուսաստանի և Թուրքիայի մրցակցության շուրջ:
Հոդվածագիր Զազա Ջխարկավայի կարծիքով, Թուրքիայի անվտանգության խորհրդի կողմից Հայաստանը և Վրաստանը թշնամի երկրների ցանկից հանելուց հետո այդ երկիրն ավելի մեծ թափով է վերագտնում իր դիրքերը Հարավային Կովկասում՝ կիրառելով նաև մշակութային դիվանագիտություն: Դրա վառ վկայությունը Վրաստանի տարածքում մզկիթներ վերանորոգելու և կառուցելու համաձայնությունն է վրացական իշխանությունների հետ: Իսկ Հայաստանի դեպքում Անկարան համաձայնեց «ֆուտբոլային» դիվանագիտությանը:
Ջխարկավան նշում է, որ Թուրքիան ներկայումս դարձել է Կովկասի երկրների հիմնական առևտրային գործընկերը: Այն Վրաստանի և Ադրբեջանի գլխավոր գործընկերն է, իսկ Հայաստանի հետ, չնայած դիվանագիտական հարաբերությունների բացակայությանը, զգալի ապրանքաշրջանառություն ունի:
Նաև սա է պատճառը, որ, չնայած արտաքին լավ հարաբերություններին, գնալով ավելի ակնհայտ է դառնում Կովկասի համար լարվածությունը Մոսկվայի և Անկարայի միջև: Դա ակնհայտ է դարձել Թուրքիայի անվտանգության խորհրդի կողմից ընդունված թշնամիների հենց այն նույն ցուցակից, որում հայտնվել է Ռուսաստանը՝ նվազագույնը առաջիկա հինգ տարի ժամանակահատվածով:
Էական է, որ Թուրքիան Հարավային Կովկասի երկրներից միանգամից երկուսի հետ ունի ռազմավարական հարաբերություններ, այն դեպքում, որ Ռուսաստանը նման հարաբերություններ ունի միայն Հայաստանի հետ և բաց հակամարտության մեջ է Վրաստանի հետ:
Հոդվածագիրը, անդրադառնալով եկեղեցիների և մզկիթների մասին երկկողմ համաձայնագրին, նշում է, որ, չնայած առկա ընդդիմությանը, հատկապես՝ վրացական կողմում, այն կիրագործվի, և ռուսական անտեսանելի ձեռքը չի կարողանա խոչընդոտել դրան,- ինչպես դա եղել է 2006-ին, երբ ռուսական ուժերին հաջողվել է Ախալցխայում շարժում հրահրել մզկիթի կառուցման դեմ:
