Այսօր Եգիպտոսում ընդդիմությունը հայտարարել է «Հեռացման ուրբաթի» մասին, որի ընթացքում փողոցներ է պատրաստվում հանել հարյուր հազարավոր մարդկանց, որոնք պատրաստվում են դիմել վճռական գործողությունների և ստիպել Եգիպտոսի նախագահ Հոսնի Մուբարաքին հրաժարվել պաշտոնից:
«Հեռացման ուրբաթից» առաջ Եգիպտոսի նախագահ Հոսնի Մուբարաքը հարցազրույց է տվել ամերիկյան ABC հեռուստաընկերությանը և հայտարարել, որ պատրաստ է հենց հիմա էլ հրաժարական տալ, սակայն մտավախություն ունի, որ երկիրը քաոսի մեջ կհայտնվի, իսկ իշխանության գլուխ կկանգնեն իսլամիստները` «Մուսուլման եղբայրներ» կազմակերպության գլխավորությամբ:
Օբամայի հետ զրույցում նա ասել է. «Դուք չեք հասկանում մեր մշակույթը և այն, թե ինչ տեղի կունենա, եթե ես հրաժարվեմ իմ պաշտոնից: Իսլամիստական «Մուսուլման եղբայրներ» կազմակերպությունը կզավթի իշխանությունը»:
Նա նաև ասել է, որ իշխանությունն այլևս իրեն պետք չէ և 62 տարվա ընթացքում նա բավականին գործ է արել. «Ես մինչև կոկորդս կշտացած եմ: 62 տարվա պետական ծառայությունից էլ հոգնել եմ: Ես ցանկանում եմ գնալ»: Սակայն Մուբարաքը կրկնել է, որ ամեն դեպքում հեռանալու է միայն սեպտեմբեր ամսին, իսկ մինչ այդ կփորձի վերականգնել երկրում կարգ ու կանոնը:
Մուբարաքը հերքել է, որ իր կողմնակիցները կապ ունեն վերջին մի քանի օրերի բախումների հետ. «Ես ցավով եմ նայում այն ամենին, ինչ տեղի է ունենում: Ես չեմ ցանկանում, որպեսզի եգիպտացիները պայքարեն մեկը մյուսի դեմ», ասել է Մուբարաքը:
Սակայն ինչպես գրում է ամերիկյան The New York Times-ը, ամերիկյան վարչակազմը պատրաստվում է հեռացնել Մուբարաքին իշխանությունից և պաշտպանել փոխնախագահ Օմար Սուլեյմանի թեկնածությունը` որպես անցումային կառավարության ղեկավարի: Ըստ թերթի`ամերիկացիները ենթադրում են, որ ստեղծված անցումային կառավարությունը, որի մեջ տեղ կզբաղեցնեն բոլոր ազդեցիկ քաղաքական ուժերը, այդ թվում` «Մուսուլման եղբայրները», կմշակի և կիրականացնի սահամանդրական բարեփոխումներ, որից հետո կանցկացվեն նոր ընտրություններ:
Սակայն թերթը նաև նշում է, որ այս ծրագիրը դեռ քննարկվում է, և որ Օմար Սուլեյմանն ու բանակը, որոնց առանցքային դերակատարություն է տրված այս ծրագրով, չեն պատրաստվում լքել Մուբարաքի ճամբարը:
Երեկ Սուլեյմանի հետ հեռախոսազրույց է ունեցել ԱՄՆ փոխնախագահ Ջոզեֆ Բայդենը, ով հայտարարել է, որ Եգիպտոսի իշխանությունները պետք է անհապաղ բանակցություններ սկսեն` իշխանության խաղաղ փոխանցման համար: Բայդենը նաև նշել է, որ երկրում ստեղծված իրավիճակի պատասխանատուն գործող իշխանություններն են, և կոչ է արել հարգել մարդու իրավունքները: Անհապաղ իշխանափոխության վերաբերյալ սա ԱՄՆ իշխանությունների առաջին կոչը չէ: Մինչ այդ այդպիսի կոչերով հանդեն են եկել ԱՄՆ նախագահ Բարաք Օբաման և պետքարտուղար Հիլարի Քլինթոնը:
Մինչդեռ այս գիշեր Կահիրեում գրանցվել են թալանի և հրկիզումների բազմաթիվ դեպքեր, և Մուբարաքի իշխանության մնալը դեռևս թույլ չի տալիս դուրս գալ այն քաոսից, որ ստեղծվել է երկրում: Բախումները շարունակվել են նաև Մուբարաքի կողմնակիցների և հակառակորդների միջև: Սակայն ընդդիմությունը շարունակում է վերահսկել Թահրիր հրապարակը և պատրաստվում է այսօրվա հանրահավաքին:
