Ինչպիսի՞ն կլինի ՀՀ Մարդու իրավունքների հաջորդ պաշտպանը: Կկարողանա՞ պաշտպանել ՀՀ քաղաքացիների իրավունքները, թե՞ կկրկնի իր նախորդների փորձը`խփելով եւ՛ նալին, եւ՛մեխին: ՀՀ ԱԺ նախկին փոխնախագահ, Քաղբանտարկյալների եւ հալածյալների պաշտպանության կոմիտեի անդամ Կարապետ Ռուբինյանը «Առաջին լրատվական»-ի հետ զրույցում կանխատեսեց, որ իշխանությունները Մարդու իրավունքների պաշտպանի պաշտոնում կառաջադրեն մեկին, որն իրենց զերծ կպահի ավելորդ գլխացավանքից:
«Նույն մեխանիզմն է գործելու, քանի որ նախագահի աթոռը բռնազավթած մարդն է փոխվել, բայց որակական փոփոխություն տեղի չի ունեցել: Այնպես որ, իշխանությունը գործելու է իրեն հոգեհարազատ մեթոդներով»,- մեր զրույցի ժամանակ նշեց ԱԺ նախկին փոխնախագահը: «Այսինքն կլինի ավե՞լի հարմարվող եւ իշխանությունների համար նախընտրելի անձ, որը հետագայում չի արժանանա «ամենաանհաջող կադր» պիտակավորմանը»,-հարցրինք Կարապետ Ռուբինյանին:
«Ումի՞ց ավելի հարմարվող, Արմեն Հարությունյա՞նից»,- մեր հարցին հարցով հակադարձեց ընդդիմադիր գործիչը: Կարապետ Ռուբինյանը կարծիք հայտնեց, որ իշխանությունները պետք է փնտրեն «կենսագրություն» ունեցող մեկին, սակայն երբեք այդ պաշտոնը չեն վստահի որեւէ սկզբունքային գործչի, որը չի համաձայնի իրենց առաջադրած պայմաններին: