Ռուսական Regnum լրատվական գործակալության փոխանցմամբ՝ Անկարայի դատախազությունը քրեական գործ է հարուցել մի խումբ անձանց հանդեպ, որոնք զբաղված էին պոռնոգրաֆիկ նյութերի, այդ թվում՝ նաև մանկական (մինչև 14 տարեկան) պոռնոգրաֆիայի տարածմամբ:
Այսօր առավոտյան թուրքական ոստիկանության իրականացրած հատուկ գործողության հետևանքով Անկարայում ձերբակալվել է 192 պոռնոգրաֆ, որոնց ձերբակալման հրամանը տվել է Անկարայի դատախազությունը: Խուզարկություններ են իրականացվել նաև Թուրքիայի այլ նահանգներում ու քաղաքներում (շուրջ 300 հասցե):
Ձերբակալվածների թվում են հայտնվել պետծառայողներ, բժիշկներ, ուսուցիչներ, փաստաբաններ ու դերասաններ: Նրանք, թաքցնելով իրենց իրական դեմքը, կարողացել են շահել իրենց պոտենցիալ զոհերի՝ 9-15 տարեկան երեխաների վստահությունը: Ստանալով նրանց մերկ նկարները՝ չարագործները դրանք օգտագործել են հետագա շանտաժի ու առավել բաց լուսանկարներ ստանալու համար:
Բացի այդ, ոստիկանությունը ձերբակալել է ևս երեք կասկածյալի, որոնց մոտից առգրավել է պոռնոգրաֆիկ բովանդակությամբ մի քանի հարյուր խտասկավառակ: Տարվում է հետաքննություն:
