Այս պահին Եգիպտոսի մայրաքաղաք Կահիերի որոշ հրապարակներում և Թահրիրի մատույցներում տեղի են ունենում փոքր բախումներ:
Al-Arabia հեռուստաընկերությունը հայտնում է, որ եգիպտական բանակը սկսել է միջամտել երկրում տեղի ունեցող դեպքերին: Առավոտյան ձերբակալվել են մի քանի հոգի, սակայն հայտնի չէ, թե դրանք հակակառավարական ցույցերի մասնակի՞ց են, թե՞ Մուբարաքի աջակիցներն են:
Որոշ տեղեկություններով, ձերբակալվածները կապ ունեն հրապարակում տեղի ունեցած կրակոցների հետ:
BBC-ի հեռուստաընկերությանը տված հարցազրույցում եգիպտացի պաշտոնաթող մի գեներալ ասել է, որ նա հավատացած է, որ բանակը շատ շուտով դուրս է գալու Մուբարաքի դեմ, և հավանաբար դա տեղի կունենա վաղը: Հեռուստաընկերության լրագրողն էլ Թահրիր հրապարակից հաղորդում է, որ բանակը հիմա փորձում է արդեն իր խոսքն ասել և կանգնել ցուցարարների կողքը:
Այս պահին ավելանում է ցուցարարների թիվը Թահրիր հրապարակում: Դրանց թիվը մի քանի հազար է կազմում: Ինչպես BBC-ին պատմել է Մեծ Բրիտանիայում հայտնի եգիպտացի դերասան Խալիդ Աբդուլլան, որը մասնակցում է հակակառավարական ցույցերին, գիշերվա ըթնացքում շատ մարդիկ են ձերբակալվել, որոնք ցանկացել են մտնել հրապարակ կամ դուրս գալ այնտեղից: Նա նաև ասել է, որ շատ քչերն են, ովքեր բախումների ընթացքում վնասվածքներ չեն ստացել:
Al-Jazeera-ի փոխանցմամբ, Թահրիր հրապարակում ցուցարարները հայտնում են, որ եթե նախորդ օրը նրանք պահանջում էին միայն Մուբարաքի հրաժարականը, ապա երեկվա հրահրված սադրանքների, և զոհերից հետո նրանք արդեն պահանջում են կախաղան հանել մուբարաքին:
